Christian Bachama aser Muslim Fulani tsüngda khatep

Abuja, Aenjeti (January) 9 (Agencies): Nigeria nung aluyimertem aser shiruru metsürtem tsüngda khatepdang nisung 10 dak tema khaset ta police-i metetdaktsü.
Lau district nung Christian Bachama aluyimertem aser Muslim Fulani shiruru metsürtem tsüngda raradang lendongji atalok.
Hokolbarnü mejangjatetba nisung kari Fulani nunger alidak amakba ajanga nisung 12 taküm sama, ta Police otongdar David Misal-i ashi. Iba sülen Fulani nungertemi tayang küpzük.
“Fulani nunger aliba tesemtem nung nisung 4 asü aser Bachama yimtsüng nung nisung 8 asü” ta pai ashi.
Ajisüaka, yimtsüng balala nung alirtemibo tasürtemji nisung 40 dak tema liasü ta ashi.
Mapang talangka ali atema mangatettep adoka arudang tamangba yimsü aser kin telemsa nung ajemdaker lendong aika ataloka arur aser tanga kasa onük atema lendong atalok.
Yaküm Rongjui (September) ita International Crisis Group-i ashiba agi, Nigeria kübok northeast tsütsü tensaji Boko Haram telungpur tensa ka ama kümdar.
Shiruru metsür Abdullahi Hamma-i ashiba agi, Bachama kin nisungtem ta temulung melemi bilemer karti anepongi Donadda, Babagasa aser Katibu yimtsüngtem amak.
“Onoki tasümang 15 tashi remogo” ta paisa shisem.
Honibarnü Fulani shiruru metsürtemi Bachama nunger teimba sür aliba Robi yimtsüng amak aser idakji alirtem dak injang khaloktsü.
“Ozü lanur 25 tashi Fulani telungpurtemi khaset” ta Robi nung lanur lennir Felix Uban-Doma-ia ashi.