Amit Shah rally nung adener parnok 37 gari lendong nung yiru

Agartala, Aenjeti 9 (Agencies): Amit Shah indang pre-election rally nung shilem agitsü asoshi BJP pusemertem den Ambassa tesemi aoba mapang nung gari tsükokba lendong balala asem tashi nung yashi nisung 37 yiruogo.
Gari lendong nung yirurtem ajak mozüki balala nung temang anepaluba mapang ka lir. Kasa mapang nung BJP puri yirurtem ajak nem parnok temang anepaluba nung sen indokba agütsütsü, ta sangdongogo.
Party tir Biplab Kumar Deb-i yirur aliba kibongtem dang party puri parnok temang anepaluba nung sen indokba ajak menoktsütsü ta ashiba den Tripura adena or tanga tesem nung temang anepalutsüsa kümra ajia parnoki anepalutsü, ta shisem. Local lenirtem dang yirur kibongtem den külemi longjemer nokdaktsü asoshi ashi.
Police sangdong ka ajanga ashiba agi gari lendong ya Dhalai district kübok S K Para tesem nung atalok. Iba lendong ya napong chanu ka kümzüktsü mechi nung paitokdang BJP pusemertem mena aliba Bolero Maxi truck ya ajua or tsükok. Iba lendong nung parnok 22 yiru aser parnok rongnungi nisung asem kanga mejungi yiruba ajanga Dhalai district hospital-i belener ogo.
Tanabuba gari lendong ya Khowai tesem nung atalok, kong tetsüra densema parnok 13 yirua liasü. Ambassa rally nung adentsüba atema BJP pusemertem mena aliba bus ya tarok kati ai aser gari anisangi gari mazüokteti tsükok. Iba tesem anasa aliba yimdaklirtem aser police-i bus nung mena alirtem nem teyari agütsü aser parnok mozüki-i anir ao. Osang ajanga ashiba agi, parnok rongnungi nisung ti kanga mejungi yirur lir.
Ano tanga gari lendong ka nung BJP pusemer ana Dhalai kübok Manik Bhandar tesem nung rally nung dener aruba mapang nung tsükoka yiru. Yirusang ana mena aliba motorcycle ya BSF gari ka den tsüktep.
Gari lendong nung yirurtem tang Dhalai district mozüki nung temang anepaludar.