Assam sorkari tajemzük tia nung alir nem ki 83,000 sütsütsü

Guwahati, Aenjeti 12 (Agencies): Lokti nung tajemzükba tia nung alir nem Affordable Housing Policy kübok jila balala nung Assam sorkari ki 83,000 sütsütsü, ta sangdongogo.
Chief Minister Sarbananda Sonowal-i Urban Development Department dang tekerba nung iba sentong yanglutsü asoshi totuyuba agütsüogo.
“Rongsenketsüng tsütsü tajemzük tia nung aliba nüburtem asoshi süoki ia bilema Assam sorkari mapang talangka melie Affordable Housing Policy ya state nung amshitsü,” ta sorkar osang ka nung sangdonga lir.
Iba telemtetba ya senden ka nung agi, kong Assam State Housing Board amenoktsü indang jembia liasü.
“Asen sorkari nisung ajak nem talitsü ki sütsütsü aoshi bendanga agütsür inyaker aser onoki Lower Income Group (LIG) aser Economically Weaker Section (EWS) nüburtem atema jila nung ki 83,000 sütsütsü,” ta Sonowal-i senden nung ashi.