Korea nung temelenshi kar adoker : Xi Jinping

Beijing, Jan 15 (Agencies) : Korea nunger tzümeketli nung temelenshi tajung kar adokdagi, ta China Tir, Xi Jinping-i US Tir, Donald Trump dang ashiba olen ka sorkar osang ajanga metetdaktsüogo. Lenir ana tsüngda phone ajanga jembiba sülen iba osang ya metetdaktsüogo.
North Korea nem tongpang nung amshiba nuclear oset yangluba anendaktsütsü asoshi Trump-i China tir, Xi kanga rongshir. North Korea-i nuclear aser missile tendangba aserbo par lenir Kim Jong-Un-i United States Tir, Trump aitsüba ajanga tensa kanga dang
mejungi akümtsü ama tsüremseta liasü.
Aji oda süaka, tawa hopta ishika tsüngda atsüanem akaba osang kar lir; küm ana sülen tawato mezüngbuba North o South Korea na tsüngda ajurutepa senden menogo. South Korea nung akatsü aliba Pyeongchang Winter Olympics nung par asayartema yoka shilem agidaktsütsü, ta Pyongyang-i mulunga agizükogo.
Korean peninsula nung temelenshi tajung karbo adokdagi, ta Xi-i Trump den phone nung jembiba idang Xinhua news service ajanga sangdongogo. \
“Kanga meranger külen tang Korea tzümeketli nung tensa süngjema aliba ya mesemadaktsüi tajungba küma bener aotsü asoshi ajaki longjemer inyaktsüla aser asentenshie ken o jembi tenzüktsü asoshi lenmang sadema lapoktsütsüla,” ta China Tir-isa ashiba olen ka kasa osang ajanga metetdaktsüogo.
North Korea-i nuclear oset yangluba dak sendakba tebilemtsü indang anogo ana senden mena ken o jembitsü asoshi linük 20 nungi Vancouver yimti nung lenirtem adenshia aliba mapang ka nung China Tiri Trump den jembi.