Brazil-i WC trok ben buba akoktsü imlar: Pele

Rio De Janerio, Aenjeti 16 (Agencies): Football asayer mongin Pele-i Tentonü ashiba agi, tang aruya aliba world cup koba Russia nung asayatsüba lir, iba asayamung nung Brazil nungera World Cup (WC) akoktsüba imlaba telok rongnung ka lir.
World Cup pungoben tashi koker aliba telok, Brazil football team ya 2014 küm semi-finals, Maracana nung asayaba mapang Germany nungeri goal 7-1 agi koka liasü, saka Pele-i ashiba agi, coach Tite-i renema tentetba team-i par linük taoba tejashibatem amadokdaktsütsü. Pele ya alima nung tanga tashi football asayartem rongnung tajungtiba ka ta züngshir.
“Tite aruba ajanga team nem kanga tajangzük agütsütsü, aser pai team tajung ka yangludar,” ta Pele-isa ashi.
“Taoba World Cup nung onok team nung asayar tajung liasü, saka team ji mebentet asü”
“Tanbo onok team tajung ka kümteta lir amai bilemer aser takok angutsü asoshi temulung lema bilemer,” ta paisa ashi.
Pele Brazil team den külemi 1958, 1962 aser 1970 World Cup kokogo. Pa temang manemba ajanga mapang talangka lokti nung shilem magi-i arur Tentonü ang lokti nung mezungbuba tejak sayua liasü.