Senjang 10 ajak tagila asütsü: RBI

New Delhi, Aenjeti 17 (Agencies): Shishilembar aikati senjang 10 magiba dak sendakba nung tanü Reserve Bank of India (RBI)-i, senjang 10 tapu 14 prongla transactions atema tagila asütsü, ta metetdaktsü.
Tanü sangdong ka ajanga RBI-i, “Tesem kar nung shishilembartem aser nisungtemi senjang 10 magiba osang Reserve Bank-i jangjaogo,” ta metetdaktsü.
Kasa sangdong ajanga RBI-i, sorkar indang senyangluba tesemtem nung yangluba senjangji circulation nung amshir, ta metetdaktsü.
Item senjang balala ajanga rongsenkettsüng, loktiliba aser sobaliba omentem sayur, aser item senjangji mapangshia tasen adoker, ta parnokisa metetdaktsü.
“Tang tashi nung Reserve Bank-i senjang 10 tapu 14 adokogo. Item senjang ajakji tagila aser transactions atema amshitsü akok,” ta RBI-i metetdaktsü.
Parnokisa bank tem dang transactions nung item senjang agizüktsü aser branches ajak nung agizüka amshitsü metetdaktsüogo.