Wabong Moatoshi Longkumer NPF nung denogo

Dimapur, Aenjeti 17 (TYO): Aenjeti 15, 2018 nü NPF Division Office, Landmark Colony PWD, Dimapur nung sentong ka agia Wb. Moatoshi Longkumer NPF nung denogo; iba sentong nung pa den temeimertem aika den taoba mapang 2 Dimapur-II A/C nungi BJP nung külem tenzükertem aika liasü, ta osang ka ajanga metetdaktsü.
Iba sentong ya Tongzuk, Vice president, 2 Dimapur- II A/C leniba nung agi aser Bendang Aier, President 2 Dimapur-II-i pelaa agizükba o jembi.
Ano sentong nungsa Er. Rhonthungo Ovung, President Dimapur Division, Aonungkum CEC Member, 2 Dimapur-II A/C aser Bishnu Battacharjee President Central Minority Wing nungeria o tatsütsü jembia liasü. Parnoki party züngsemtem dang, taruba assembly election nung party candidate-i takok angutsü atema meranga inyaktsü iba den külemi tesüiba mapangtem amadoker ka küma longjemer party ka ama inyaktsü ayongzüka liasü.
Sentong nung jembidang Moatoshi Longkumer-i NPF party züngsemtemi pa party nung agizükba atema pelaba metetdaktsü, iba den külemi taoba mapang BJP nung külemi inyakertem- President, Tongzuk-i anir Executive members, Youth Wing President aser office ketdangpurtemi pa dak tamang akaba atema pelaba lemsatep.
Paisa party züngsemtem aser temeimertem aikati pa nungitba atema pelaba den külemi longjemer inyaktsü mepishia metetdaktsü.
Paisa Party constitution nung aliba ama inyaktsü ta nangzüka liasü.
Dimapur atema mangdang lemsatepa pai, “Onoki Dimapur ya asen talidak kümdaktsütsü, kong kin ajak tesünep nung litettsü, kong pei kidang kümzüka alitsü, aser shianga tetsübu makai rongsenkettsng jenjang junga kümdaktsütsü,” ta ashi.
Paisa, “Iba mangdang ataloka lisopur rongsenkettsüng renloktsü atema maongka agütsütsü asoshi self employment sabang agütsütsü,” ta metetdaktsü.
Keri Pfukha President Women Wing 2 Dimapur-II-i tepela anküp o jembiba sülen loktii shilem agia sarasadema iba sentong tembanga liasü.