Nagaland sorkari Tsüngrem jashidaktsür : NTCA

Dimapur, August 29 (TYO) : Naga nungertem ochimashi inyakyim anema longjemer aliba mapang ka aser ano asen lokti nung temenen mapatem anema raraba mapang ka nung Nagaland sorkari mashilen bilema mapa inyaker, ta Nagaland Theological Colleges Association (NTCA)-i sangdong ka nung metetdaktsü.
Nagaland nung alirtem dangi Heraka kechiba bener arur aser Heraka ajanga Nagaland nung alirtem asoshi kecha inyaka lir. Gaidinliu aser lar Heraka yimsüji Nagaland nung alirtem den yimten aser tamangba tsütsü tesentaktep kecha mali. Iba ochiji ajaki jangjajangja meteta liakasa, state sorkari la nem tetushi agütsüba mapa nung yaritepba atema kanga aoksar, ta NTCA tir, Pete Z krose aser tatong tir, Mar Pongen nati külem sangdong nung shia lir.
Asen nübortem shimtetba Khristan lennirtemi Centre sorkari apiteta inyakba mapatong nung tenük amor ajemokba aser parnok tamang jenjang menentsüsa mapa inyakba ngua tanga yimsütem dang nüma medenteter. State sorkari iba mapatong pusema nungitba ajanga parnoki Khristan tamangba yimsü indang kuli tamajung sayuogo aser Khristan purtem tenüng menüktsüogo. Itemji dang masü saka nübortemi parnok lenisüba nung joko temulung melemtettsüsa kümogo, ta NTCA-isa metetdaktsü.
Tsüngrem senzüka toktsüba aser tanga ashikülak tanela ka matsüngdang apudakba ajanga ayatai mapang bener arutsü.
Yisu-i “Oba, parnok dang tai tokang, kechiaser parnoki kechi inyaker aji parnoki memetet” ta sarasadem, saka tanü yimsüsürtemi kechi inyaker-ar kanga junga meteta inyaker. Shisa akartemibo Tsüngrem ain madokdaktsür saka temoatsü ang meshir. Yimsüsübaren nung koma-ar ka külak-kübonga aser sangrasangjia inyakonga Tsüngrem-sa tematiba aser peii kechi inyakdir ibaji arotsü, ta NTCA sangdong nung shia lir.
Khristar Arogo akangakanga lir aser Tsüngrem anema inyakba mapatem den raratsü atema tashi itta noktaka lir. Ajisüaka, tarutsü anogotem nung Gaidinliu tushitsü atema inyakba mapatong ya anentsü aser tetezü mali akümtsü ta onoki amanger aser sarasademer, ta Nagaland Theological Colleges Association (NTCA)-i mendenpurtemisa sangdong nung shia lir.
Nagaland Theological Colleges Association (NTCA)-i iba mapatong anema noktaker aser Gaidinliu indang nüngshilung yanglutsü aliba tesem nung asen Tsüngrem tali sentsüwangdaktsütsü asoshi kangki mesüra Ten Commandments indang nüngshilung mesüra The Beatitudes tezülubatem ayu nung kanga ajungtsü, ta NTCA-isa sangdong nung tebilemba ka shisemogo.