Naga yimtenren temelenshi tulu mapang ka nung lir: Naga Hoho

Kohima, August 29 (TYO): “Naga nungertem yimtenren tsütsü temelenshi tulu bener arutsüba mapang ka nung lir aser tang Naga nungertemi nüngdakbaji telongjem lir,” ta Naga Hoho Tir, P Chuba Ozüküm-i ashi.
Peren district kübok Jalukie nung Zeliangrong Baudi aser All Zeliangrong Students’ Union of Assam, Manipur & Nagaland-i ayongzükba Haipao Jadonang indang 84 buba Martyr Day sentong nung jembidang Naga Hohoi Tir Chuba Ozüküm-i iba onük jembi.
“Küm jenti asenoki raraogo aser temelenshi imlaa liasü, aser iba mapang nung asenok aika teimla samaogo, ajisüaka tang asenok nem telatetba ka (Centre aser NSCN-IM tsüngda Yimjung tenangzüktep) bener arutsüdang asenoki aikati, asenok tsüngda telongjem mali aser anogo shia kin o kin tsüngda aser pei asoshi dang bilemba mapang ka nung asen Naga nungertem iba temelenshi agizüktettsüsa asenok renema lir ma ta shisadanger,” ta paisa ashi.
“Asenoki item ajak ya koktetra, tarutsü asoshi asenok teimla lir,” ta Naga Hoho tir-isa ashi.
“Tang asenoki nüngdaka alibaji Naga nunger linük tenzükertem telok ajak, kin balala, Arogotem aser yimtsüngtem longjemtsüla aser iba nungjagi maparen tenzüktsüla,” ta paisa ashi.
British sorkar nem saru magütsütsü atema 1927 küm Jadonang lenisüba nung sentong tenzükba atishia Chuba Ozukum-i, “Yimten ka kübok Naga nunger ajak ka ta asüba tangatetba ya tawa benokba masü, saka British nunger yimsüsüba mapang nungi liasü,” ta Chuba Ozüküm-isa ashi.
British nungeri saru tali saruba ajanga Naga nunger libaliro nung mejungi kongshi, aser Naga nungeri yimtenren telungjem ka nüngdaka aliba mapang Jadonang walunir sür apusoba indang Naga Hoho Tirisa ashi.
“Bendangertem ta züngshiba British nunger aridokba ajanga yimtenren ka amenoktsü asoshi Jadonang-i anir yimtenren sentong ka tenzük. 1931 küm British nungeri lisü agi alenseta südaktsüsang Jadonang ya nükjidong ka ataloktsü asoshibo taküma tenla agütsütsü mulungtetba nisung ka liasü, ta paisa shisem.
Chuba Ozüküm-isa, “Tang Nagaland nung pa ama lenirtem nüngdaka lir- lenir ka shibai pei asoshi merumerua mebilemi Naga nunger asoshi ajak bendanga agütsütsü mulungba lenir nüngdaka lir,” ta ashi.
Iba sentong nung Naga Hoho Tir den Assembly Secretary, K Elu Ndang aser Secretary (Admin) Chitho Nyusou na aden.
Sentong nungsa Jadonang nem akhüm tetushi agüja Jalukie B Village, Zeliangrong Heraka School tanurtemi ken ka aten, LBP Samzuiram Pastor, Asanbo-i sarasadem, Zeliangrong Baudi (AMN) Tir, Raitu Chawang-i lokti pela agizük aser ZSUN Tir, Amonbo-i tepela anküp o jembi.