Advisor Yhoshu NPF nungi anenogo

Kohima, Aenjeti 20 (TYO): Nagaland state assembly election agitsü mapang ana nung lia NPF nung telemsa adoka Party MLA temi anener tanga maongka tajungba bushi tenzükogo.
Ajioda tawa Cabinet jenjang nung Advisor to Chief Minister for Mechanical Engineering jenjangi ajungketsang 14-Southern Angami-I Assembly Constituency nungi NPF MLA, Vikho-o Yhoshu-i iba menden nungi anenba dang masü saka 12buba NLA aser NPF nung primary aser active züngsem anaprong nungi anenogo.
Pai anenba shidiji State Assembly, Chief Minister’s Office aser NPF Party nem agutsüogo, ta Yhoshu den inyaksemer kati metetdaktsü.
Ajisüaka pa tanga yimtenren party ka nung adentsübo memetetdaktsü.
Chief Minister, TR Zeliang-i yaküm küm tatemlen Home Minister nungi anentsüsang, Y. Patton-i tama, taküm Aenjeti 9 nü MLA nungi anena liasü, iba sülen taruba election nung tokteptsü atema BJP nung aden.
Ano maneni taruba anogo ishika tsüngda NPF MLA tem anener tanga party nung adentsü imlar. Tang menden 60 aliba Assembly nung NPF MLA 45 kümogo, BJP MLA 4, Independent MLA 8 aser menden asembo tazüng lir.
2003 küm nungi state nung NPF-i asembenren yimsü südar, ajisüaka yaküm küm tom nungi party sasep nung mepetmesü adoka taoba mapang Chief Minister asembenren inyaksang aser Lok Sabha MP, Neiphiu Rio-i Nationalist Democratic People’s Party tentetba ajanga tang yimtenren anokshidar.