Taoba Catalonia Tir Carles, Copenhagen tongogo

Copenhagen, Jan 22 (Agencies) : Taoba Catalonia Tir, Carles Puigdemont shiba dang pai Belgium toktsür ora pa aputsü asoshi warrant agütsütsü ta Madrid-i tekümdangtsü osang metetdaktsür liasü, iba ozüngji mangai dang tanü Hombarnü Copenhagen yimti tonga aruogo.
Denmark yimtiba Copenhagen nung tayimtsü anendak tonga arur külen osangbenertemi pa bushia aruba noksa ka Danish broadcaster TV2 ajanga prokshiogo aser kasa osangji pa den külemi arurtemia tejangja shiogo.
Pa Denmark tonga arura idangjisa supreme court judge nungi pa aputsü warrant ka meshitsü, ta Spain nungeri metetdaktsür anogo ka dang lirbo pa tonga aru.
Puigdemont-i aniba telok pakzüka aotsü asameyanga lia Madrid-i par cabinet anentsüba sülen taoba October ita tatemlen pa Belgium bushia jena ao.
Aji oda süaka, region nung lenirtem ken o bushisüngdangba maparen nung tetsükdak aludaktsütsü ta bilema Supreme Court nung obendanger Pablo Llarena-i pa aputsü warrant magütsü.
Pa Spain-i arura aputsü ta bilema Puigdemont yagi pa jenoka alidak nungi dang region-ji yimsü süner.
Spain ato kilonser, Mariano Rajoy-i ashiba agibo tanga lima nungi pai Catalonia nung yimsü asütsüji ozüngi memelar.
Ano tanga osang ka ajanga ashiba agi, Catalonia region nung tir inyaktsü atema parliament nung tokteptsü asoshi taoba lenir Carles Puigdemont tenüng mezüngbuba shimtetogo.
Spain sorkari ashiba agi, Puigdemont ya tanaben Catalonia tir menden atema meshimtettsü mesüra pai region yimsü mesütettsü kechiaser tang pa pasasa Belgium nung jenoka lir aser vote agütsüdang pa tonga marutettsü.
Aji oda süaka, ‘modern technology’ amshia pai tanga linük nungi yimsü asütsü akok, ta pa pusemertemibo metetdaktsüogo.