Germany-i maneni Afghanistan yaritsü: German FM

Kabul, August 30 (Agencies): Deobar nü Afghanistan semdangba mapang Germany foreign minister Frank-Walter Steinmeier-i, “Onoki Afghanistan maneni yaritsü,” ta ashi.
“Germany-i talangka asoshi Afghanistan linük rongsen ketsüng tsütsü dang masü saka parnok security tashi itshidaktsüba nunga teyari peria agütsütsü,” ta Afghanistan o Germany linük na tembar kümer küm 100 ajungba tenüng nung Presidential Palace (Arg) sentong ka akadang Frank-Walter Steinmeier-i ashi.
Iba sentong ya Afghanistan national television RTA ajanga live sayua liasü aser iba mapang German foreign minister-i, rara ajanga kanga akoksar aliba linük Afghanistan tanaben pei tetsüng agi jajatetsü asoshi onoki nungita yarirba lir, ta ashi.
Iba sentong nung Afghanistan sorkar nungi chief executive Abdullah Abdullah aser Kabul nungi international den inyakera kar densema liasü.
Tir Mohammad Ashraf Ghani-i, Germany ji Afghanistan asoshi tembar kanga tajung lir, ta ashidang pai küm 14 tashi Germangy-i yaria aruba atema kanga pelaba metetdakja liasü.
2014 December ita rara matem tashi NATO-i aniba International Security Assistance Force (ISAF) inyakyim kübok Germany sepai 4,000 dak tema Afghanistan nung liasü.