Nepal-India arrtsü tongshi ajak nung GPS enoktsü

Kathmandu, August 30 (Agencies): Nepal aser India nati arrtsü tongshi ajak nung global positioning system (GPS) enoktsü mulungtepa lemtetogo.
August 26 nungi 27 tashi Dehradun, India nung Boundary Working Group (BWG) senden akaba mapang iba telemtetba agia liasü.
Arrtsü kilometre 1,880 nung tongshi 8,553 azüngtsü, ajak nungji GPS enoktsü aser item GPS ji tesem 83 (control points) ajanga azüoka ayutsü.
“Tongshi nung GPS enokba ajanga tongshi raksaba mapang pa sasa asü, mesüra nisungi raksar aji metettsü,” ta Nepal Department of Survey nung Director General Madusudhan Adhikari-i ashi.
Arrtsülen aliba tongshitem kechi agi südir süaka raksaba ajak melentsüji BWG mapa lir.
2007 küm arrtsü telemsa yangluba mapang Nepal aser India nati map 182 yanglua liasü saka iba nungji Susta o Kalapani nabo tensema mali.
Mapang shia arrtsü nung aliba tongshitem raksaba mapang mezüng aliba tesem nung azüngtsü asoshi mangatettep adokba ajanga GPS enoktsü asoshi mulungtepa lemtetba lir.
Iba asoshi inyakyim ya 2015-2016 nung inyaktsü tebilemba lir, ta Adhikari-i ashi.
Tzü aliba tesemtem nunga tongshi balaka azüngtsü asoshi linük ana mulungtepogo.
Adhikari ashiba agi, Nepal-India arrtsü kilometre 640 shi tzü nung lir aser ibaji ajanga tongshitem karakara raksar anungji item tesem asoshi tongshitemji balaka design süa yanglutsü aser tsüngküm nungang azüngtsü.
Tongshi 8,553 azüngba nungi 1,325 bo mali aser 1,956 tashi raksaogo mesüra teraksar dang lir. Itemji melena tasen azüngshitsü, ta Adhikari-sa ashi.
Iba maparen mezüng shilem 2016, June ita nung tembangtsü aser tanabuba shilem 2016, October ita nungi tenzüktsü.