Telungpuri Pak tayimtsü anendak Engineer ana kahset

Karachi, August 30 (Agencies): Balochistan province, Pakistan tayimtsü anendak tesem ka nung airport rangben azüokba takdang kati telungpur telok ka raradang amshiba hadir teperi bener ia amaktsü tenzük aser iba mapang radar system raksatsüba den külemi engineer-a ana kahsetogo.
Item telungpur ya motorcycle 12 nung aru aser Gwadar district nung aliba Jiwani tayimtsü anenba tesem amak. Iba tesem ya port-city akümtsü Pakistan nükjidong lir aser ibaji atema China-ia sen aika enokja lir.
Telungpurtemi tan amakba tayimtsü anenba tesem ya küm 20 shi mamshii liasü aser parnoki yangji aliba radar system kenyongi ajasaa raksatsüogo. Parnoki kahsetba rongnung ka electronics engineer, Khalilullah ta jangjaogo aser nisung ka pua bener aodang Mahmood Niazi kanga mejungi yiruja liasü.
Lendong ataloker ghonda ishika lir külen ang Mahmood Niazi indang tasümang angu, ta Gwadar Deputy Commissioner Abdul Hameed Abro-i ashi.
“Parnoki amakba mapang, iba tesem nung alir nisung pezü dangbo kecha meshii doktsür ao,” ta Abro-i ashi.
Iba tayimtsü anenba tesem ya Pakistan- Iran tzü arrtsü anasa lir.
Police-i ashiba agi, lendong atalokdang iba tesem nung security kanga ajema liasü aser kanga aoksaa dang parnoki arua amak. Ibaji ajanga telungpur temi kanga sadema arua lendong agütsü aser parnok aruba motorcycle nungsa jena ao.
Balochistan Chief Minister Abdul Malik Baloch-i iba tatalokba aitsüogo.
“Iba lendong agütsür nisungtemji pua temerenshi dalang agütsütsü,” ta Abdul Malik Baloch-i metetdaktsüogo.
Tang tashi nung shingaia iba lendong agütsüba tenüng magii lir, saka Pakistan nung mapang shia security aser oset tulu raksatsür telok, Baloch nationalist tem asütsü, ta mulung melemi bilemer.
Yaküma telungpuri security uniform semer arua Pasni, Gwadar nung international radar system raksatsüba mapang security ka kahset aser ka yiruja liasü.
Ano yaküm June ita nunga telungpurisa Jinnah International Airport, Karachi amakdang nisung 36 tepset aser 10 yiruja liasü.