Kasheto-i BJP nungi anen

Dimapur, Aenjeti (January) 25 (TYO): Election nung tokteptsü tebilemba alir nisung 14 den külemi Bharat Janata Party (BJP) nung adenba sülen anogo ana shi dang lirbo taruba election nung Ghaspani-I nungi tokteptsü tebilemba alisang, Z. Kasheto Yeptho-i Yangtepnü (Brihostibar) BJP nungi anentsü telemtetba agiogo.
Osangbenertem den jembidang Kasheto-i, pa pusemertem den senden ka amendang parnoki pa dang regional party ka nungiang tokteptsü mepishia liasü, anungji pai pa pusemertemi mepishibaji mesendokteti BJP nungi anentsü atema telemtetba agi, ta metetdaktsü.
Paisa, taruba election nung pai regional party ka nungi tokteptsüa akok, talisa Naga People’s Front (NPF) nungi tokteptsü akok, ta metetdaktsü.
Maneni paisa, Nagaland Baptist Church Council-i ayongzükba “Clean Election” mapatongji pai pusemer, kechiyong tarutsü tiaji iba nungji lir, iba den külemi pai lanurtem tenüng nungi toktepa tepetzük tia nung alirtem atema inyaktsüner, ta metetdaktsü.