Ao Senden-i ayonga Mkg dist. rangben mokdang

Mokokchung, Tsüklai (February) 01 (TYO): Core Committee of Nagaland Tribal Hohos and Civil Organizations (CCNTHCO)-i lemtetba nung ajemdaker Ao Senden-i Tsüklai (Feb) 1, 2018 nü anepdang 6:00 nungi aonung 6:00 ako tashi Mokokchung district rangben takok ngua mokdanga liasü.
Iba mokdang ya tongtibangsa Naga nungeri election masü saka Naga yimtenren tebilemtsü onük tama latettsüla ta asüba puküma ayongba liasü. Tanü ghonda terana mokdangba mapang nung Mokokchung nung dokan kata melapok aser garia kata mejajai yimti yimdong ajak kanga azüngmeyaka liasü. Iba mokdang dak sendakba nung petsaperong aser lendong timtem atalokba osang kecha maliasü.
Mokdang sentong tembanger külen Mokokchung police point nung mensem ka alidang Ao Senden Tir, Wb. Imliyanger Jamir-i, “Ao Senden-ibo Naga nungeri lemtetba ama mapa agi inyakogo,” ta metetdaktsü.
Iba mokdang dak sendakba nung lokti balala den yimtsüng balala nungi putu menden, osangzülur, administration, police aser nübur ajaki amalitepba ajanga iba sentong takok tulu nguogo, ta Ao Senden tir-isa pelaba olen ka metetdaktsü. Tarutsü nunga tanü amai tensa balala ajurudang nüburtemi Ao Senden den amalitepa yariteptsü asoshi paisa ayongzük.