October 2 nungi ‘Modicare’ mapa küma inyaktsü: Arun Jaitley

New Delhi, Tsüklai (Feb) 02 (Agencies): 2018 küm Union budget nung National Health Protection Scheme (NHPS) sangdongogo, aser iba ya taküm October 2 nungi mapa küma benoktsü, ta osang ka ajanga metetdaktsü.
Iba scheme ya ajanga Rashtriya Swasthya Bima Yojana (RSBY) melenzüktsü aser iba scheme ajanga jila tilatem aser yimtsüngtem nung healthcare facitilies tajungba agutsütsü.
Iba scheme ya ajanga kibong crore 10 ayimjemtsü aser kibong crore 50 tajangzük angutsü, ta yashi Parliament nung Union finance minister, Arun Jaitley-i metetdakja liasü.
Iba ya alima nung sorkari senotsü agüja inyakba healthcare programme tulutiba asutsü, ta Jaitley-isa shisem.
Parliament senden tembangba sülen Doordarshan News nung interview ka nung jembidang Jaitley-i, “Kenü anogo nungbo nüburtemi ‘Modicare’ takok ngua inyakdar, ta ashitsü,” ta metetdaktsü.
NHPS ajanga sensakertem aser tepetzük tia nung aliba nüburtem mozükidang amongba atema sen lakh 5 agütsütsü.
Iba dak alia RSBY-ia item ama timtem atema küm nung sen 30,000 agutsütsü.
Ajisüaka, tang aliba group policies telatetbatem ama sen lakh 5 agütsüra sorkar senpong nungi sen crore 50,000 indoktsü.