BJP-i candidate 20 shimogo

Kohima, Tsüklai 3 (TYO): BJP-i Nationalist Democratic Peoples’ Party (NDPP) den tesentaktep yangluba sülen Nagaland nung Tsüklai 27 nü Assembly elections atema candidate 20 indang tenüng metetdaktsüogo.
Candidate temji Pughoboto election district dena district 10 nungi lir aser parnoki Kohima o Peren district tem yutsüogo.
BJP State unit-i candidate 45 lir ta shiyonga aru saka NDPP den tesentaktep yangluba sülen parnok menden 20 dang lemzük aser iba jagi State Unit president Visasolie Lhoungu-i Northern Angami-II menden nung metokteptettsüsa tensa ka ajuruogo.
Lhoungu-i 2014 küm mezüng atema Northern Angami-II by-election nung toktep aser idangji pai asemben tashi Chief Minister inyaksang Neiphiu Rio’er jala kinungbo aser NPF candidate Dr Neiphrezo Keditsu den tamakok angu. Rio-i Lok Sabha-i aoba ajanga iba by-election ya agitsüsa aküm.
Tang Rio-i NDPP indang Chief Minister candidate ka ama tokteptsü meyipa aruba aser BJP den tesentaktep yangluba ajanga Lhoungu ola madoktsüsa akümer ta osang angazüker.
BJP indang candidate 20: Dimapur-I – Tovihoto Ayemi, Ghaspani-I N Jacob Zhimomi, Pughoboto – Dr Sukhato A Sema, Chizami – Kevechutso, Jangpetkong – Dr Longrineken, Alongtaki – Imna Along, Akuluto – Kazheto, Atoizu – K L Chishi, Suruhoto – Kehovi, Tyui – Y Patton, Wokha – T M Lotha, Bhandari – Mmhonlumo Kikon, Tizit – P. Paiwang Konyak, Tehok – C Kawang Konyak, Longleng – Pangnyu Phom, Longkhim Chare – Imtilemba, Tuensang Sadar-II – Rakhila, Noklak – Haiying, Seyochung-Sitimi – Kashiho Sangtam aser Pungro – Yankiu Yimchunger.
Parnok 20 rongnung tongtipang candidate temji taoba Chief Minister K L Chishi, taoba Home Minister Y Patton, tang teinyakdak Minister Paiwang Konyak, tang teinyakdak Advisor to CM aser taoba minister Dr TM Lotha aser taoba minister Pangnyu Phom nungertem asütsü. Candidate 20 nungi tetsür candidate ka dang lir aser laji Rakhila lir.
Nagaland State Assembly nung tang temendak BJP MLA pezü Paiwang, Dr Lotha, Mmhonlumo aser Imtilemba Sangtam nungertem candidate 20 rongnung dena lir aser külen Independent MLA Jacob Zhimomi aser MLA Pangnyu, Patton o Tovihoto nungertemi tawa tu BJP nung aden.
Aenjeti 29, 2018 nü Nagaland nung political party temi külem sangdong ka agütsüba nung election magidang Naga yimten latetang ta takhangba agütsüba pusema election nung shilem magitsü ta telemtetba agiba metetdaktsü, saka BJP-i iba telemtetba nung madener aser elections nung tokteptsü ta metetdaktsü.
Tang tashi nung Nagaland assembly election atema Central Election Committee-i candidate tem shima sangdongbaji BJP mezüng lir.