Yimjungbo yimjung tajungba

Yimjung tetezü tetsübu mali, anungji kong aser kodang südir süaka yimjungsa tajungba. Aji oda, Naga yimten tebilemtsü tatembang mekümteti tebilemtsü agi sünger aruaka, taoba küm ishika India sepaitem o Naga nunger sepaitem na aser Naga nunger o Naga nunger na tsüngda meraratepi yimjung nung aruba ajanga tetsübu tarendak melii aruogo. Atangji, yimjung mapangji tebilemtsü maliba mapang masü saka tetsübu maliba mapang ta asenoki angatettsüla. Alima nung tebilemtsübo teti alitsü kechiyong nisungji inyaker dang chiyongtsüla aser parnok nüngdak aser taginübaji kodanga tatembang makatsü. Ajisüaka, tetsübu melii aliba nisungtemi tebilemtsüji temoatsü küma inyaktettsü. Iba jagi asen lima nunga yimjung ali nung dang terenlok mapa inyaktettsü ta asenoki jembir. Iba tangatetba nung Naga nunger yimten nüjiso bushirtem telok ajak India sorkar den yimjung nung aliba dang masü saka Naga nungertem rongnunga yimjung nung aliba ajanga asenok tetsübu makai lia aruogo. Ajisüaka, tang NSCN-K telok o India sorkar na tsüngda yimjung maliba ajanga parnok dang masü saka Naga nunger ajak tetsübu aser tarendak nung alitsüsa kümogo. Aji oda, NSCN-K telok o India sorkar na tsüngda yimjung mapang anenba sülen Kohima nung, Meluri len, Manipur len aser tang Pangsha nung lendong atalokbaji ajak asoshi takoksa tulu aser tetsübutsü osang lir. Iba ama mapang ya India sepaitem aser NSCN purtem asoshi dang masü saka nübortem asoshia tatidaktsü aser tetsübutsü mapang ka lir. Ano, talisa tang ama Nagaland ajunga nung Armed Forces (Special) Powers Act, 1958 agüja aliba ajanga India sepaitemi kecha tarendak aser tebilemdang melii nisungtem dak injang yoktsü akoker. Ashiko, asüng tesem mashi ka nung India sepaitem tsüngdang gari toudak ka tyre apokba agi yangji aoksar gari nung alirtemji dang masü saka yimti nung alirtem ajak tesama aser takoksa ajurutsüsa sepaitem jagi injang dang masü saka bomb dena yoktsüa akok. Tanü iba ama tensa ka nung asenok lidagi. Aji oda, iba ama tetsübu aser tarendak tia ka nungbosa malitsüsa Naga nunger lenirtemi maneni yimjung bushitsü nüngdaker. Naga nunger taginübaji India-i Naga yimten temeten aser sobaliba angatettsüla aser Naga nungertemji Naga nunger ama yimten aser sobaliba temeten mebenshitettsüsa aser mamshitettsüsa India temzüng agi malentsüla. Iba temeten asoshi Naga nunger taküm aika tenla agütsüogo. Aji oda, tangbo Indiai Naga nunger tebilemtsü ya yimten tebilemtsü ta angatetogo aser yimten tangatetba nung Naga nunger tebilemtsü latettsü merangba mapangba angur. Iba ama mapang ka nung India den tsükchitepba ajanga shinga tajangzük mangutsü, anungji kechisüdir süaka NSCN-K teloka India den tanaben yimjung nung alitsüsa lenmang bushiteptsübaji kanga tenüngdaktsü kümogo. Atangji, yimjungbo yimjungsa tajungba saka yimjung bushitsüba mapaji tasak aser ano yimjung nung alitsübajisa tasakba. Ajisüaka, alima nung yimjung nung alitsübajiang tongtibangtiba asünungji yimjung asoshi ajaki tenla kabosa agütsütsü nüngdaker. Tanü India sorkar o NSCN-K na tsüngda yimjung maliba asoshi ajaki shisabolur. Ibayongji, Naga Hoho aser ENPO nati anir oagi Myanmar tashi oa NSCN-K lenir den ajuruteptsü terenemba lir. Ano, parnok mouteti alidang Naga Mothers’ Association (NMA) purtembo oagi Pangsha nung NSCN-K lenirtem ajurua yimjung indang jembitsü lia yakanü lendong atalokogo. Ibaji kanga tesasatsüka lir. Ajisüaka, yimjung mangu tashi bushitsübaji ajak asoshi khuret aser tayongzükba tulu asütsü. Tang ya Naga nunger asoshi rarateptsüba mapang masü saka teti asoshi yimjung bushitsüba mapang lir ta angatetter. Ibaji Naga nungertemi dang masü saka India-ia angatettsüla aser Indiai Naga nunger lenirtem nem NSCN-K lenirtem ajurua yimjung asoshi jembitsü lenmang sadema lapoktsütsüla. Yimjung nung maliba ajanga shinga majangzüktsü. Iba jagi Naga nungertem kanga timatemtsü aser India-a kanga akoksatsü.