BJP-i Northeast renlokdaktsür: Narendra Modi

Agartala, Tsüklai 8 (Agencies): Pai aniba sorkari northeast India renloktsü atema inyaker saka Tripura nung Left-i küm 25 tashi sorkar ketdangsüa aruba ajanga state-i tangar memeneper ta Prime Minister Narendra Modi-i ashi.
“Centre nung BJP sorkari northeast India renlokdaktsütsü atema temulung agüja mapa inyaker, saka Tripura nung Left sorkari tesüiba küm 25 sorkar tim mesüi ketdangsüa aruba agi tangar memeneper” ta tanü Sonamura nung election nüboyimba sentong ka nung Modi-i ashi.
Vajpayee-i aniba sorkari Development of North Eastern Region Ministry tenzüktsü aser ozü sorkaria northeast nung infrastructure ajungkettsü atema mapa inyaker, ta paisa shisem.
Northeast nung aou aika aliba tajangzük lia amshitsü atema Rs 1,300 crore National Bamboo Mission ka tenzükogo, ta Modi-isa metetdaktsü.
Manik Sarkar luja olen ka jembidang “Sarkar indang kurta temesüng telung nung tammang ka lir. Tanga state tem nung sorkar mapa inyakertem nem itasen tajung agütsüdang par sorkaribo nübortem külakoktsü” ta Modi-i ashi.
“Tesüiba küm 25 tashi Left teloktemi nübortem puadaktsü. Tangar memenepba indang nübortemi memetet liasü, saka tang Tripura state tarutsü melenshitsü atema mapang aruogo” ta paisa shisem.
“Tripura nung sen 100 endokba shia Centre sorkari sen 80 agütsür. Manik Sarkar sorkari Centre-i agütsüba sen timi mamshir aser parnoki sensakertem nem agütsüba sen auyazüka agir” ta Modi-isa aitsü.
“Left sorkar nem maneni sorkar ketdangsüa odaktsüra, state nung terenlok kecha malitsü. BJP nem sorkar akümtsü tashi agütsüra, ochimashi anentsü” ta paisa shisem.