PM Modi-i linük 4 semdangtsü apusoa ogo

New Delhi, Tsüklai 09 (Agencies): Ato kilonser, Narendra Modi-i Palestine, Jordan, UAE aser linüktem semdangtsü atema tanü New Delhi nungi apusoa ogo.
External affairs ministry-i osang ka ajanga, Gulf aser West Asian region nung aliba linüktem den lenla aika nung tesendakatep yanglutsü atema Ato kilonseri item linük semdanger, ta metetdaktsü.
Ketdangsertemi ashiba agi Modi-i anogo pezünü (Tsüklai 9-12) tashi item linük semdangba mapang nung energy aser security nung amaliteptsü, shishilembaba aser investment aser kiralongraratem anema raratsü atema jembitsü, ta metetdaktsü.
Tanü pa apusoa maodang Modi-i twitter ajanga, Gulf aser West Asian region ji tesendaktep nung kanga tongtibang ka lir, ta metetdaktsü.
Pa Amman atongba sülen pai Jordan King Abdullah II ajurutsü.
India nunger Ato kilonser rongnung Palestine linük semdangba mezüngbubaji Narendra Modi asutsü, aser iba mapang nung pai Tir, Mahmoud Abbas ajurutsü.
Ano Oman aser United Arab Emirates linük naprongla nung Modi-i India nunger sensotem ajurua jembitsü imlar.
Pai Dubai yimti nung UAE aser Arab CEO tem den jembidang India nung rongsenkettsüng maongka balala indang metetdaktsütsü.
Modi-isa Oman Sultan densema iba linük nung lenirtema aika ajurutsü.
UAE nung pai tatong Tir aser Ato kilonser Sheikh Mohammed bin Rashid aser Abu Dhabi Crown Prince Sheikh Mohamed bin Zayed den senden amentsü.
Modi-i UAE semdangba mapang nung tezüngzüktep 12 bosa agitsü imlar.