Beijing, IAAF World Championships tembangogo

Beijing, August 30 (Agencies): Deobarnü IAAF World Championships, Beijing tatembang anogo nung Canada nunger Derek Drouin-i alemshishiba nung gold medal nguogo.
Corunna, Ontario nungi arishi küm 25 tain, Derek dak alaka shingaia metre 2.34 malemtetba ajanga pai gold medal nguteta liasü.
Gold medal atema alemshishiba nung pa, Ukraine nungi Bohdan Bondarenko aser China nungi Zhang Guowei nunger den toktepa liasü.
Parnok asem rongnung shingaia metre 2.36 malemtetba ajanga metre 2.34-i bener alur alemdakja liasü.
Iba medal ya zünga tan asaya nung Canada nungeri medal ajak agi tibuba angur asütsü.
Drouin-i 2012 Olympics aser 2013 world championships naprongla nung bronze medal angu aser taoba ita Pan American Games, Toronto nung asayaba mapang gold medal bena liasü.
Külen tetsür marathon asemtepba nung Mare Dibaba-i gold medal angu. Iba ya Ethiopia asoshi iba asayamung nung mezüng medal angur asütsü. Lai iba marathon mapang 2:27:35 agia mezüngbuba jenjang asemzük.
La sülen tanabuba jenjang angula dak nungi la second ka agi tekaraba atong.
“Tirunesh Dibaba ji ni kanga ulua bilemer. Ni la den kinüngera masü saka lai Ethiopia linük asoshi konang bentsür aru. Lai ni ajungmeso aser tan takok anguba ajanga ni la tsüngsü mesamadaktsüi kümzüka ayur ka amai kümogo,” ta Mare asemtepba temer külen ashi.
Ano tebur metre 1,500 asemtepba nung Asbel Kiprop-i gold medal angu. Kiprop-i minute 3:34.40 agia iba medal asemzüka liasü. Pa sülen Elijah Motonei Manangoi-i minute 3:34.63 agia silver angu aser Morocco nungi Abdalaati Iguider-i minute 3:34.67 agia bronze medal ngua liasü.