Yameen-i Europe nunger diplomats den majurutep

Male, Tsüklai 09 (Agencies) : Tanü Rogonü Maldives Tir, Abdulla Yameen-i ‘European diplomats’ den ajuruteptsü memulung; linük nung melangmapu adokba sülen bendanglen nungi mezüngbuba aruba tulurtemji paronk liasü, ta osang ka ajanga metetdaktsü.
Tulurtemji European Union, Germany aser Britain nungi liasü; tan hopta nung supreme court obendanger tazüng purtem aser sorkar inyakyim tsütsü adentsü memulungertem aika apuba sülen, parnokji linük yimtiba tonga aru.
Yimtenren nung ajemdaker pua aliba lenir par teku chioktsü asoshi Supreme Court-i tetuyuba agüjaka Tir-i ibaji manga aser pa tetuyuba nung ajemdaker linük nung ’emergency’ alitsü sangdonga lir; item tatalokba sülen tang asetkong linük tila nung ya mepetmesü adoka lir.
Yameen-i sorkar den obang mapurtem anema inyakba indang ken o lemtepa jembitsü asoshi diplomats parnok asemi mepishi, ta Sri Lanka nung aliba German Ambassador, Jorn Rohde-i metetdaktsü. Yameen-i inyakbaji democracy inyakyim anema lir, ta UN human rights nung tekolakbai sangdonga lir.
“Tejashitsüka, UK/EU diplomats densema onok den tanübo ken o kecha mejembitsü, ta Maldives sorkar metetdaktsü. Tia maka onoki mepishibaji magizük. Tejakleni aotsü atema yamaji inyakbaji tim masü,” ta Rohde-i Twitter ajanga sangdong.
Tang Yameen-i linük nung ’emergency’ alitsü sangdongba den külemi pa tir menden nungi atsüngdoktsü aliba ‘judiciary & parliament’ tashi agienadok aser Chief Justice den obendanger ka densema pua lir.
Pa anema nokdaker yakbangtem ajak kar tepuokdak aser kar tanga lima nung jenoka lir, ta kasa osang ajanga metetdaktsü.