BJP Central lennirtemi Nagaland semdang

Dimapur, Tsüklai 9 (TYO): Tsüklai 27 nü assembly election atema Bharatiya Janata Party National General Secretary for Organisation, Ramalal den North East Organisation in-charge Ajay Jamwal nati anogo ananü atema Nagaland semdanga liasü.
Tenati Tsüklai 8-9, 2018 anogotem Nagaland semdang aser idangji party lennirtem den senden balala amen, ta Media Cell, BJP Nagaland sangdong ka nung metetdaktsü.
National lennir anati BJP Dimapur party züngsemtem den BJP candidate- Tovihoto Ayemi (Dimapur-1) aser N. Jacob Zhimomi (Ghaspani-1) na den senden amen.
Maneni, Ramalal aser Jamwal nati NDPP den joint co-ordination meeting ka amen aser idangji BJP State President Visasolie Lhonugu aser taoba Chief Minister aser tang teinyakdak MP Neiphiu Rio na den party anaprong nungi lennirtem aden.
Tenatisa BJP election Management Committee, Sub-Committees aser BJP Core Committee Members den ajurutepa sendentem mena liasü, ta Media Cell sangdong nungsa shia lir.
Prime Minister Narendra Modi-i alizüngtem ayuba tongteta inyaktsü atema party züngsem ajaki meranga inyaktsü atema National BJP General Secretary Ramlal-i ayongzük.
Central BJP lennirtemi BJP State Unit-i election atema mapa tajung inyakba nung temulung asür ta committee balala den ajurutepdang ashi, ta Media Cell-isa metetdaktsü.
BJP Election Management Committee-i Central BJP head Office dang Nagaland nung nüboyimba mezüngbuba shilem nung Prime Minister Narendra Modi, Home Minister Rajnath Singh, BJP National BJP President Amit Shah, Minister for Road Transport & Highways Nitin Gadkari, Minister for Information and Broadcasting & Textiles Smriti Irani, Delhi BJP tir Manoj Tiwari aser Minister of State for Home affairs Kiren Rijiju nungertem dendaktsütsü atema mepishia metetdaktsü.
Maneni BJP Nagaland-isa party züngsem ajak dang BJP candidate maliba Mandal tem nung alliance partner NDPP den yariteptsü mepishia metetdaktsü aser NDPP-ia kasa mapaji inyaktsü imlar ta shisem.
Central BJP lennir anaji tanü tayimtsü ka nung Shillong-i apusoa ao. Meghalaya nunga Tsüklai 27, 2018 nü assembly election agitsü.