BJP candidate, Ayemi-i Dimapur-1 A/C nungi tokteptsü sangdong

Dimapur, Tsüklai 12 (TYO): 13buba Nagaland Legislative Assembly election nung Dimapur-1 assembly constituency nungi tokteptsü tebilemba alisang BJP candidate, H Tovihoto Ayemi-i Tsüklai 27 nü election nung tokteptsü atema sangdongogo.
Tanü DDSC stadium, Dimapur nung declaration sentong nung jembidang taoba NPF MLA aser tan election nung BJP nungi tokteptsü atema party nung adensang, Ayemi-i, “Nüburtem lenmang shidaki anitsü aser asen nükjidong atongtsü atema ni BJP nung aden,” ta metetdaktsü.
BJP-i lokti nung telemsa adokdaktsütsü mapatem inyaker ta aikati aitsüba dak sendakba nung pai, BJP ya yimtenren party ka lir aser alima nung party tulutem rongnung ka lir, iba party ya tamangba yimsü den sendaktepa mali, ta ashi.
Paisa, taruba state sorkarji BJP aser teloktep party-i akumtsü imlar, ta ashiba den nüburtem dang parnoki temelenshi bener arutsü, ta nangzük.
Iba sentong nung Dimapur Sumi Baptist Church nung Senior pastor, Rev. S Vitoshe Swu-i meshiteta sarasademtsü aser E-DMC councilor cum Election Chief Agent, Kuhoi Zhimo, BJP Tir Dimapur, Bendang, BJP Mahila, Dimapur, Rosy Yanthan aser BJP station election campaigning convenor, HK Khullu nungeria o tatsütsü jembia liasü.