Tanur tasotsü tim lenmang ajanga asotsü teinyaktsü kar

Tsüklai 17, 2018: Tanü-asüngbo mashisa aliba tetsütemi tanur asodang kangshiba paidoktsü atema caesarean/c-section (surgery agia tanur rangtetba) kanga bulua agir, ibayongji ibaji nokdangtsü atema Tsüklai (Feb) 15, 2018 nü World Health Organisation-ia ‘childbirth guidelines’ reprangshiogo. Akhidangbo tanur tetsü mesüra tanur asütsüsa tensa ka majurura tanur tim lenmang agi dang sotsü, saka tangbo tanur rangtetba ya kanga bulua kümogo.
Tanur tasotsü tim lenmang agi asotsü teinyaktsü kar:
* Pregnancy Care tajung bushiang mesüra certified midwife teyari agiang: Tetsür aikati obstetricians teyari agir, ajisüaka study balala aika ajanga, midwives-i kanga takok ngua tanur tim lenmangi sotsüba bushitetogo. Midwives ji forceps mesüra vacuums ama amshitsü training magi saka parnoki tanur kanga junga sotsür. Ano tanur jakrep asotsüsa süra mesüra temang nung tashidak lira midwives aser obstetrician naprong teyari agitsüla.
* Na anepalur obstetrician dang nai akokba tashi tanur tim lenmang ajanga soner ta shiang. Na anepalur obstetrician dangji la indang “primary cesarean rate” asüngdangang. Cesareans shilemji 15-20% süra junger.
* Natural birthing class nung dennang, ibaji ajanga na C-section magii tim lenmang ajanga tanur sotettsü. Iba class nung tangu sashiba tasa balala sayutsü, iba denji külemi pain-atuba mozü magii labor pain alitsü. Temang position aser tangu sashiba exercises agiba ajanga C-section magi tim lenmangi tanur sotettsü.
* Chiyungtsü aser Exercise agiba: Mashisa alidang chiyungtsü tajung achitsüla; protein aketba chiyungtsütem, süngjanglijang aser süngolemba den carbohydrates achiba ajanga na tanur asotsü mapang nung na temang tashi itta alitsü. Tali yiraba mesüra kongraba ajanga aiben cesarean agitsüsa akumer, anungji chiyungtsü shidak achiba aser exercise agiba ajanga temang touzük shidak ayutsüla. Mashisa aliba mapang piyong exercise agitsüla. Jajazütsüla mesüra temang meyirutsüsa exercise tezüpa kar agitsüla.
* Tanur asotsü mapang atongdang, talisa ‘last trimester’ nung peria anisüngzüktsüla aser peria mejangtsüla. Mashisa aliba mapang mejangdang kanga timtemer, anungji nü tetsüng koleper abelen tsütsü shir mejangtsü merangang. Iba denji külemi pillow amshia nü teberem metangang.
-Source: Internet