Aor candidate tem dangi: “Apijemtsü Shin 12:22”

– Among P. Aier

Tsüklai 16, 2018 nü Ao Baptist Arogo Mungdang (ABAM)-i Impur nung Aor candidate-tem atema sarasademtsüba sentong ka ayonga agiogo aser iba nung candidate pungu dak alaka tanüngba Aor candidate ajak denogo. ABAM-i Clean election dak rangloker 13 buba Nagaland Legislative Assembly (NLA) election nung tokteptsü pur Aor candidate tem ajak jaoka iba sentong agia liasü. Atangji, asenok tamangertem atema sarasadem ya kangasa tongtipang aser kechisarena ajak nung Tsüngrem dang nungi temoatsü aser taochi meshia inyakba nung tajangzük lir. Nagaland nung Tsüklai 27, 2018 nü assembly election agitsü aliba nung constituency 11 nung Aor candidate ajak agi parnok 37 lir aser iba ya asenok asoshi temoatsü ka ama züngshitsüla. Kechiyong asenoki reprangdangra tangar dang nungi alia Tsüngremi asenok Aortem meimer aser tangarbo lokti lennitsüpur peria meliaka, asenokbo menden 11 atema lennir 37 tashi adokbaji Tsüngremer temoatsü lir aser Pai asen Aortem maneni aochidar ta asüba kuli lir. Nagaland nung election maparen kanga mejungi inyaksaba, tim masüba den ochimashi inyakyim ajanga yimsüsürtem shimtetba ajanga asen lima tia mejungi lir. Iba jagi arogoi anir telok balalai election merüka agitsü aser ochishia yimsüsür tetemsütem shimtettsü aser parnoki sorkar ketdangsüa aoba ajanga asen lima nung temelenshi bener arutsü nükjidong nung Clean Election yimyim ayimba manener. Aor temeshi li Impur nung candidate kwikati tetsüng ajemokogo aser arogo tenzükertem nem sarasademdaktsüogo, nenok Tsüngrem nungi temoatsü ngulanglang ta amanger. Nenoki arogo tashi angabaji Tsüngrem tashi angaba den kasa aser nenok tangatetba tajung ngua nübortema kanga pelar. Nenoki kechi arogo aser Tsüngrem tsüngdang nangzükogo, ibaji teraksama aser ochishia tan election ya tangatem dang nungi khenyongi balaka südaktsütsü atema merangangma. Hao, nenok election-i aitsü ta asüba sülen nungi nübortemi meshimetsüa arur alitsü aser parnok nem nenoki senotsü mesüra rongsen mesüra osettsüsettem agütsüra alitsü akok. Ochimashi mesüra tim masüba mapatem-a kar inyaka arur alitsüa akok, saka item ajak atema Taochisang Tsüngrem dang nungi tatok meshiangma aser tanü nungi tenzüker election agitsü anogo ishika lia, nenoki tangatetba tajung nung aser Clean Election tenüng nung ochisha inyaktsü merangangni ta ayongzüker. Tsüngrem tsüngdangbo ochimashi meinyaktsü nangzük saka takok ngunüdang nenoki tashiyim amshira, mesüra ochimashi inyakra, mesüra süpokrem amshira, künü anogo Tsüngrem iba atema nü dang tasüngdangba alitsü aser idangji nai metizüktsü. Election nung na takok angutsü atema mapa inyakba nung aser nüboyimba nung sen mesüra rongsen lemshiba masü, tiyazü o jembia senzüba masü, tangar kar luja jembiba masü saka nai takok ngua yimsüsür menden nung menra, nür constituency atema, nür district atema, Naga lima atema nai kechi inyaktsütsü ta asüba mangdang aser alizüngtem ang lemsatepangma. Apijemtsü Shin 12:22 nung “Tiyazü tebang Kibuba tsüngdang tesempatsü, saka ochishia inyakertemji pa pelatsü” ta shia lir. Anungji Khristan tamanger tajung ka ama, Tsüngrem akhümtsübua aser tamangertemi aginüba angateta Aor candidate ajaki 13 buba NLA election ya khenyongi balaka aser tangari tatishitsü süa benshitsüsa mapa tajung inyaka sayuangni ta ayongzüker.