Sen yong asen maitsü yoka machitsüla: Dr Shurhozelie

Dimapur, Tsüklai 19 (TYO): Naga People’s Front tir Dr. Shürhozelie Liezietsu-i tanü Naga nunger dang maitsü aser sen wazüka ayutsü tebendang metetang ta ayongzük.
“Sen tashi aser tiyazü tenangzükbatem ajanga asenok tamang aser maitsü mekokdaktsütsüla” ta NPF Zunheboto division election rally nung o jembidang Dr. Shürhozelie-i ashi.
2018 election nung külen sen agi Naga nunger vote agütsürtem amaktsü saka ano külen NBCC-i clean election yimyim ayimoktsür. NDPP-BJP teloktepi tanga kecha agia masü saka sen agi dang Naga nungertem mesüzüker, anungji nübortemi telemtetba shitak agiang, ta paisa ayongzük.
“Tangar ajanga Nagaland nung lendong bentsür arutsü ta Arogotemi ajiteta parnoki item lendong matalokdaktsütsü atema mapa inyaker. 2018 general election ya political party balala tsüngda tetoktepba ka masü saka asen tamangba, maitsü aser bendanger tashitem tsüngda tetoktepba ka asütsü akok, ta Dr. Shürhozelie-isa shisem.
Ajisüaka, taruba election nung NPF-i dang menden teimba nung takok angutsü aser NPF-i Naga nunger kümzüka ayutsü. 1964 küm tentetba NPF party ya political party ka dang masü saka iba telok yagi Naga nunger maitsü atema noktaker, anungji asenoki kechiba asen maitsü aser lokti raksatsüsa ajitetba tanga political party tem nem asen tarutsü agütsütsü, ta paisa ashi.
Party tasen NDPP ya Election Commission of India-i ano magizük aser iba telok ya sorkari magizükba yimtsüng mesüra school tasen ka ama lir. NDPP-i BJP den kibong aküm aser parnoki Naga lima nung BJP tanur asotsü meranger, ta Dr. Shürhozelie-isa ashi.
NPF-i BJP den menden lemsateptsü memulung aser iba jagi NDPP-i BJP nem menden 20 agütsütsü mulunga tenangzükba agitep. BJP-i Naga lima nung tera yanga asenok reshikangshidaktsütsü atema NDPP-i parnok den yariteper,
NPF ya Naga nunger atema, NPF party ya Naga nunger shia indang lir. Anungji Naga party mesüra tangar party ka shimtsüba telemtetbaji Naga nungertem agitsüla, ta paisa ashi.