Aurangzeb Road agi Kalam melentsü Mayawati memelunger

Lucknow, August 31 (Agencies): Tawa Delhi sorkari Aurangzeb Road melena taoba linük Tir Dr APJ Abdul Kalam nüngja melentsü ta sandonga liasü, saka Bahujan Samaj Party Tir, Mayawati-ibo iba telemtetbaji ashishiogo.

Sangdong ka ajanga Mayawati-i, Mughal Chuba Aurangzeb aser Bharat Ratna angusang APJ Abdul Kalam naji puto mapang balala nungi lir. Iba Road nüngja melentsü lemtetbaji ajanga melungsentsü tila sayur aser yimya tentet tai ka tenzüktsü, ta ashi.

“Iba telemtetba ajanga linük nem tenüng menük bener arutsütsüa akok,” ta lai ashi.

Iba telemtetba agientsüla ta takhangba agüja lai, tanga Road kar mesüra Road tasen ka ang Kalam nüngtem nung jaloktsütsüla, ta lai ashi.

APJ Abdul Kalam nem akhüm tetushi agütsüba temaitsü kobi melii Delhi nung nüngtugu lenmang, Aurangzeb Road agi pa (Kalam) tenüng melentsü, ta tawa AAP tongti aser Delhi Chief Minister Arvind Kejriwal-i metetdakja liasü.

August 28 nü New Delhi Municipal Council (NDMC)-ia iba telemtetba ya agizükogo.

August 28 nüsa Kejriwal-i twitter ajanga, “Tenüngsang agütsür. Aurangzeb Road agi APJ Abdul Kalam Road ta melentsü NDMC-i tang telemtetba agiogo,” ta ashi.

Ano külen BJP nungi East Delhi MP, Maheish Giri-ia twitter ajanga, iba telemtetba agitsü pusemba atema MP ajak dang pelar, ta metetdaktsüogo.

Taoba Tir Kalam asüba sülen nübur aikati pa nüngtem nung takhangba balala agüja arudagi.