BJP aser Congress-i Jerusalem-i anir aotsü nangzükba magizüker

Kohima, Tsüklai 20 (TYO): BJP aser Congress dena Nagaland nung political party temi Temeshi Lima- Jerusalem-i anir aotsü nangzükogo saka Khristantemi ibaji magizüker.
Tsüklai 27 Nagaland Assembly election atema BJP-i manifesto ka sayaba nung, senior citizen board ka tentettsü aser parnok küm shia lucky draw ka ajanga nisung 50 shimteter Jerusalem semdangi anir aotsü ta shia lir.
Ano, Congress indang manifesto nunga, state sorkar indang ozüng ka ajanga Board ka tentettsü aser sen tajemba agi Jerusalem reprangi aotsü atema yariteptsü ta metetdaktsü.
Taruba assembly election nung BJP-i Nationalist Democratic Progressive Party (NDPP) den yaritepa menden 20 nungi tokteper aser külem Congress-i menden 18 nungi tokteper.
Ajisüaka, Khristantem teimba ser aliba Nagaland state nung vote agütsürtemi national political anati inyaktsütsü ta nangzükbartemji balaka ketasena magizüker.
“Iba ya yimtenren tsütsü nangzükba lir aser onok Khristantemi iba amala tenangzükbatem magizüker” ta Nagaland Baptist Church Council (NBCC) General Secretary aser Nagaland Joint Christian Forum (NJCF) president, Rev Dr Z Keyho-i ashi.
“Temeshi aini aoba aser tourism ya khenyongi balala. Temeshi aini aoba ya kija aser tanüla tsütsü lir saka tourism yabo mapang endokba aser alima tsütsü indang tangatetba ka lir. India ya secular linük ka lir, anungji political party temi pei ajangzüktsü atema tamangba yimsü nung ajemdaker inyaksangshi masütsüla” ta Rev Keyho-isa metetdaktsü.
“Koba party arudir aruaka, tashishitsü melii sorkar ketdangsüa aotsü aser public senotsü timi amshitsü imlar, saka temeshi aini aotsüba aser tourism jibo kija nem dang telemtetba agidakjang” ta paisa shisem.
“Political party temi tamangba yimsü nung ajemdaker mapa inyaktsü nangzükba magizüker aser iba ajanga Khristan vote agütsürtem atsür marutettsü” ta paisa shisem.
Nagaland Christian Revival Church president, Rev N Paphino-ia ashiba agi, “political party temi inyaktsütsü ta nangzükba atema sasa bilemtsür, kechiyong iba tenangzükba ajanga Khristantem memesüzüktettsü.”
“Item ajak ya yimtenren tsütsü tajangzük bushia inyakbatem dang lir, ajisüaka item ya takok mongutettsü. Khristantem mesüzüktsü merangba inyakyim ajanga political party tem tenüng ang menüker” ta Konyak Baptist Church Kohima nung pastor Moba Konyak-ia ashi.
“Iba ama tenangzükbatem magizüktsü kechiyong Arogo ya sorkari ketdang asüba telok ka masü” ta paisa shisem.
“Jerusalem ji Temeshi Lima aser Khristan ajaki iba yimti semdangnür. Yimten yimsüsürtemi mesüzükba ajanga masü saka pei sasa merangba ajanga dang iba lima semdangtsü. Nibo iba ama tenangzükbatem magizüker aser kü indang vote yoka machitsü” ta Neivizotuo ta ser theologian katia osangbener dang ashi.