Election maparen timi dang inyaka arudar: CEO Nagaland

Kohima, Tsüklai 21 (TYO): Nagaland nung election dak sendakba ken o 20 tashi atalokogo aser nisung 50 tema tepuokdak yuogo ta Chief Electoral Officer (CEO) Nagaland, Abhijit Sinha-i tanü ashi.
Taküm Aenjeti ita nungi election dak sendakba lendongtem atalokba rongnung Mokokchung district nung ken o 11, Wokha nung 9 aser Phek nung ka liasü. Mokokchung nung tai tongloktsür nisung 42 aser Wokha nung 15 tashi tepuokdak ayu aser Phek nung atalokba atema tang ken o tebushidak lir, ta tanü Abhijit Sinha-i osangbener dang ashi.
“Ajisüaka, state nung election dak sendakba maparen tiptema dang inyaka arudar aser nisung asüba osang kecha mali” ta paisa shisem.
Tsüklai 15, 2018 nü election nung mapa lemzüka aliba Indo Tibetan Border Police (ITBP) ketdangser ka Tuensang nung temulungjang timtem adoka asü aser idangji DEO Tuensang-i par kibong nem sen lakh 10 teyari agütsüogo, ta CEO Nagaland-isa metetdaktsü.
Tsüklai 25, 2018 nikongdang 4:00 ako tashi nung Nagaland nung political party aser candidate temi election atema nüboyimba maparen tembangtsü. Anungji, iba mapang matongdang star campaigner tem aser constituency nung madenertem ajaki tesem toktsür aotsüla” ta paisa ashi.
Election nung proxy voting ya ozüng alema inyakba mapa ka lir aser kibong nung tekolakba mesüra yimer atema village council temi tangar indang vote agütsütsü makok. Anungji, vote agütsür shiai pei sasa vote agütsütsüla aser proxy voting khenyongi memelatsü, ta Sinha-isa shisem.
CEO Nagaland-isa presiding officer aser polling party tem dang proxy voting amala tim masüba inyakyimtem meinyakdaktsütsü atema tetuyuba agütsüdang “ozüng alema inyakba putetra iba polling station nung vote agütsüba ka danga magitsü aser polling ketdangsertem dena aibelener ajak ozüng kübok temerenshi alitsü” ta metetdaktsü.
Election Commission of India (ECI)-i aginüba ama Nagaland kübok polling station 2196 nung electricity, tzü tajemtsü, metsümeshidak, ramp amala Assured Minimum Facilities agütsütsü merangdar, ta paisa ashi.
13 buba Nagaland Legislative Assembly indang election nung election district 11 kübok polling station 2196 nungi women polling teams 177 alitsü, ta CEO-isa shisem.
2013 küm assembly election nung polling station 2024 liasü aser item rongnung All Women Polling teams 76 liasü.
Tetsür temeja indang polling team temji – Kiphire dak alaka Dimapur nung 26, Peren nung 11, Kohima nung 9, Pughoboto nung 7, Phek nung 5, Mokokchung nung 32, Zunheboto nung 6, Wokha nung 20, Mon nung 30, Longleng nung 16 aser Tuensang nung 15 asütsü.
Voter tem yaritsü atema mobile application ka yangluogo aser iba App ajanga voter kati voter ID, polling stations, Electoral Roll pdf, candidate affidavit, election expenses amalatem angutsü akok. Iba app ji Google Play Store nungi mesüra Chief Electoral Officer, www.ceonagaland.nic.in indang website ajanga download asütsü akok, ta Abhijit Sinha-isa metetdaktsü.
Election agitsü anogo pungu dang anünga lir aser election ochishia aser timi agitsü atema onoki akokba tashi mapa inyaka arudar, ta Additional Chief Electoral Officer, N. Moa Aier-ia osangbener dang ashi.