Asen dak alang lenir shimdi

Central National Health Mission Funds nungi  senotsü agibo mapang shidak nung Nagaland atonger, ajisüaka tan ita, Tsüklai 9, 2018 nü sangdongba National Institution for Transforming India (NITI) Aayog indang Health Index Report nung state tilatem rongnung jenjang teküboktiba nung aliba state ji Nagaland lir, ta sangdongogo. Iba index nungji Manipur, Meghalaya, Sikkim, Goa aser Arunachal Pradesh state tembo ‘Achievers’ (junga inyakettertem) ta züngshiogo. Health Index nung dang masü saka terenlok asadangba Index balala- Public Affairs Index, Human Development Index, Social Progress Index ama nunga Nagaland jenjangji junga malitsü. Süra iba kuliji kechi ajanga ta shisadangra, ya tanga kecha masü saka Nagaland nung nübur meimba lenirtem agi anüngba ajanga lir. Democracy lima ka asünungji nüburtemi lenirtemji shimteter; Nübur tenzüktsü shimtetba maongka aser akhümketji kanga tulu, ajisüaka lenirtemi iba jenjangji mangatetba ajanga nüburtem okronger. Asenoki memoa, lenir aika dak nübur meimba shisatsü mangur, lenir aika nübur tenzükertem masü saka pei kinünger adianutem aser parnoki meteta aliba nisungtem tenzükertem dang kümogo. Social media nung lemsaba ocettem reprangdangra sorkar, yimtenren lenirtem, ketdangsertem aser sorkar mapa inyakertem dak mulung masüba ocet aika angutsü, iba denji külemi ocet nung o semlok agütsürtemia mulung masüba indang jenti lemsatepba angutsü. Nagaland nung mezüngbuba Legislative assembly election 1964 küm agi, aser iba mapang nungjagi tenzüka constituency shia MLA ajaki pei dang nungibo nüburtem taoba ta meima inyak asübo asen state ya komaka renloker lila ta shisadanger. Constituency shia nungi nübur meimba lenir kata mali asü?, mesüra nüburtemi tetemsü lenirtem meshimer?, ta shisadanger. Nagaland state jenjang anguba sülen, asen state nunga Tripura nung tang teinyakdak Chief Minister, Manik Sarkar aser taoba mapang Tamil Nadu Chief Minister, Kumaraswami Kamaraj na ama nübur meimba lenirtem aika adok asübo tanü asen state ya koba jenjang ka nung lila ta bilemer. Taoba mapang TN CM, Kamaraj-i kodanga takar küma chuba ama alitsü menükshi. Pa achi-ajem, aben-süoshi aser libaliro kanga tongmelang liasü, aser pa CM inyakdang pai pa itasen shilem timbakati sensakertem yari. India nung yimtenren lenir aika amitsür/sangremer lir, yamaji ama pa-a kibong mekümi liasü aser takar akümtsü memerangi nüburtem meima tenzük. Ano külen tang Tripura CM teinyadak, Manik Sarkar ya kanga ajemalu aser tongmelang lenir ka lir. Pai pai takar akümtsü mebilemer ibayongji pa meyong ki den gari kata mali. Sarkar-i sen alozüka agitsübo yutsür pa itasen 12,500 jia magii par party, CPI(M) nem agütsür aser pa kinungtsü pension agi dang kibong mesür. Ajioda India nung chief minister tem rongnung sensaktibaji Sarkar lir, saka nüburtem tenzükba nungbo pasa takartiba asütsü südi. Item kuli ajanga Tripura state renloker aser nüburtem anisüngzüker. Tena ama kanga tongmelang taküm meliaka nübur meimba tsütsü Nagaland nunga Chief Minister, Minister tem aser MLA ajak CM ana- Kamaraj aser Sarkar ama südaktsüner. Centre nungi tzülok ama sen molamoshia yokaka nüburtemi lenir tajung meshim tashi mesüra nübur meimba lenirtem madok tashi asen state merenloktsü. Asenoki asen dak alangba lenirtem aser sorkar ka shimtsü, anungji tan election nungbo tejak mereprangi tetemsü candidate nem vote agütsüdi; pei constituency nung candidates 4-5 aliyonga tetemsü candidate melira ‘NOTA’ nung vote agutsüdi.