“Jai mata di”

Anogo ka tejakdang nungi Nagaland nung social media aser talisa WhatsApp nung video ka kanga prokshidar aser iba video ji Nagaland kübok tesem ka nung Bharatiya Janata Party (BJP) nüboyimba sentong ka agidang tangokba lir. Kechiba iba video prokshir aser kechiba ashishiteper ta süra iba video nung nisung kati anir teloki yimyim ayimer aser iba mapang “Jai mata di” ta asüba yimyim-a ayima lir. Ashiko iba nisung jagi “Jai mata di” indang tetezüji memetet sernung ayimba alitsü akok aser telok jagia iba tetezüji memetet sernung anidaka ayimoktsü südi, saka iba nung tashishitsü keta lir aser Hindu nunger dak alaka tanüngba tamangba yimsütem atema iba yimyim ya khenyongi meputep. Kechiba “Jai mata di” (Jay Mata Ki ta-a ajar) olen atema ashishiteper ta süra iba ya Hindu nungeri parnoki amangba tetsür tsüngremtem nem tetushi agütsüdang aser külemdang amshir. Hindi oshi nung “maa” aser “mata” ta asüba ya tetsü dang ajar aser iba ya Hindu nungeri külemba tetsür tsüngrem Vaishno Devi den sendaktepa lir. Vaishno Devi dang Mata Rani, Trikuta aser Vaishnavi ta tenüngtem-a ajar. Anungji Hindu nungeri Jai Mata Di ta asübaji ‘tetsü tsüngrem tenüng sangang/tushiang/akhümtsübuang’ ta asenoki meyipzüktsü akok. Hindu nungertemi iba yimyim ya parnoki külemba tetsür tsüngrem Vaishno Devi külemdang tongti süa amshir saka ano parnokisa külemba tetsür tsüngremtem- Saraswati, Laxmi, Samaleshwari, Kali, Tarini, Pataneshwari, Sureshwari, Durga, Tara mesüra tanga tetsür tsüngremtem nem tetushi agütsüdanga amshir. Süra, Khristan tamanger teimba ser aliba Nagaland state nung BJP lennirtemi Hindu nunger külemküjadang ayimba yimyim ayima senzübaji putep asü meputep? Khristan tamangertemia BJP pusemer ta sayua iba yimyim ayimoktsübaji putep asü meputep? BJP nung züngsema aliba Naga nungertemibo manganütsü akok, saka India nung nisung aikati BJP dak temulung malemer aser parnok dak lendong keta lir ama bilemer. Iba jagidang Nagaland nunga Khristan lennir aikati iba telok anema noktaker. Nagaland assembly election agitsü lemtetba sülen nungi BJP aser Naga nunger Khristan lennirtem tsüngda o toktepyonga arudar. Ya kechiba ta süra, BJP ji RSS aser Sangh Parivar den sendaktepa aliba agi lir aser item telokji Hindutva tangatetba nung tentetba aser iba alizüngji atongtsü atema kanga meranga mapa inyaksangshia aruba teloktem lir. India nung Hindutva tangatetba nung noktakba nisungtemi Khristantem dang masü saka tanga tamangba yimsü amangertem aser telok tilatem anema mapa inyaka arur aser BJP-i sorkar küma aliba state tem nung iba dak sendakba lendong teimba atalokyonga arub asenoki angashir. Hao, BJP lennirtemi ashiba ama BJP ji tamangba yimsü den sendaktepa maliba political party ka asütsü akok, saka parnok jembishinü aser inyaksangshi ajanga ibaji mesayur. Parnoki Hindutva alizüng yur mapa inyaker aser Hindu nunger tangatetba nung linük madak ketdangsütsü meranger. Iba jagi dang Nagaland nung Naga nungertemia “Jai mata di” ta ayimtsüsa parnoki mapa inyaktetogo. Iba ya Khristantem ta ajaba Naga nunger atema maaksü ulura, aser ajak dang tematibaji aseni amangba Tulusang Tsüngrem kanga jashidaktsür alitsü. Anungji shirnokisa iba yimyim ayimogo, apudaka tatok meshiang, lumiang aser joko iba yimyim ya kodanga mebilemtettsüsa nü mulungsentsü melenshiangma. Tatemsa, tanü nungi Naga nunger Khristantem tebang nungi iba yimyim madokdaktsütsü atema arogo lennirtemi maneni aser tali temerangba nung pei santem angatetdaktsütsü merangangma ta ayongzüker.