Vote agüjangma

Nü indang senti vote ajanga asen lima tarutsü tia yanglutsü anungji tanü nai nü indang temeten amshia vote agüjangma. Alima nung democracy linük tulutiba nung asenok senso ka ka lir aser iba jagi linük ketdangsüba menden nung amentsüpur shimtsübaji asenok indang temeten dang masü saka tongtipang teinyaktsü ka lir. Linüki aginüba ama inyaksangshirtemi dang sorkar inyakyim majungba anema ola adoktsü temeten lir, anungji election nung asenoki vote agütsütsübaji asen teinyaktsü aser iba inyakyim ajanga asenoki ketdangsübaren nung temulung machiba mesüra tezü atangba mesüra junger ta bilemba indang kuli agütsüteter. Nagaland state nung taruba sorkar menden nung amentsüpurtem shimtsüba anogo tongogo. Tanü asenoki shilem agiba ajanga kümsük tom nung timtem kar madokra, taruba küm pungu atema asen state lennitsüpurtem shimtettsü. Sorkar ketdangsübaren nung ochimashi agi sünger aliba, tim mesüi inyaksangshitepba, otiotia sen auyazüka agiba, tiyazü tenangzükbatem agiba amala ajanga nisung aikati election nung shilem maginür aser vote agütsüdakia maoer. Ajisüaka, iba tangatetbaji tai lir kechiyong asen lima melenshidaktsünüra, sorkar ketdangsübaren jungdaktsünüra asenoki yimsüsür tajungtem shimtsüla aser ibaji asen senti vote agütsüba ajanga dang inyaktsü akok. Democracy linük ka nung kanga dang tongtipang mapa rongnung election ya lir aser iba nung senso ajak kasa temeten lir aser tebilemtsü-a dena lir. Asenoki sorkar majung ta aitsüba aser tai tonglokja jembiba kija agi temelenshi bener marutettsü saka election nung vote agütsüba ajanga dang asen lima nung temelenshi bener arutettsü. Nai nü indang vote agütsüba ajanga yimsüsür tajung shimtettsü aser iba jagi taruba sorkar nung tajangzük agütsütsü koka lir. Talisa, sensotemi election nung shisa kaa vote agütsüba ajanga linük nung democracy tashi itshir. Anungji, tanü polling anogo nung vote agütsütsü temsüa alir ajaki pei lemzüka aliba polling station nung oa vote agütsütsü ayongzüker. Nai tanü vote ka agütsübaji kanga  dang senti lir ta metetang aser ibaji nü indang temeten aser teinyaktsü ka ta angateta, ochishia aser nü mulungsentsü nung agütsünüa bilemba candidate nem angati atema dang agüjangma.