Mokokchung district nungi candidate 35 toketeper

Mokokchung, Tsüklai 26 (TYO): Mokokchung district kübok Assembly Constituency ter (10) lir aser item nungji candidate ajak senteper parnok 35-i taküm election nung tokteptsü renema lir.
Candidate 35 rongnung politics nung tejak tasen purji parnok 13 lir, tanüngbatemji tejak tejentem dang lir. Tejak tasen pur rongnung retired bureaucrats, retired IPS officer, advocate, osang zülur, kaketshir tenzüka arurtem, business inyaker, lokti asoshi inyaker aser theologian densema lir.
21 Tuli constituency nung ya tang temendak MLA Amenba Yaden ya 2013 nungto Independent nungi adoka NPF nung aden aser tangji pa NPF ticket nungi tokteper. Taoba MLA aser tang JD (U) candidate L. Temjen Jamir ya 2008 election nungto NPF nungi adok saka taoba 2013 election nung pa tamakok alu. Independent candidate I. Chubatangit ya taküm agi tanaben election nung tokteper aser NCP candidate Imtiwapang Jamir yaa 2008 election nungto khenbo toktepogo saka madok. LJP candidate Lipokmar Tzüdir, NDPP candidate James Yaden, INC candidate Lepzüngchiba par asem ya politics nung tejak tasentem lir. Aor candidate rongnung tanubusangji INC candidate Lepzüngchiba asütsü, ta osang kar ajanga angazüker.
22 Arkakong constituency nung tang temendak MLA-ji Nuklutoshi lir, pa ya 2003 nungto BJP nungi toktep saka madok. Saka 2008 & 2013 term ana atonga adokogo. Küm anaprongji NPF ticket nungi dang adok aser tangjia pa NPF nungi air. Taküm pa den toktepertemji tejak tasen dang lir; NDPP candidate Adv. Mayang Lima, NPP candidate Imnatiba aser Independent candidate K. Temjen Jamir nungertem lir.
23 Impur constituency nung tang temendak MLA-ji Dr. Imtiwapang Aier lir. Pa ya 2013 election nungto Indian National Congress nungi adoka küm ana sür tesadang shi opposition nung liasü. Aji sür, sorkar nung temelenshi ka adoka pa NPF nung adentsüsa kümadok aser Speaker jenjang tashi tongtet. Takümbo pa NPF ticket nungi air. Pa den toktepsangji retired IAS officer T.N Manen lir. Manenba ya 2008 election nung RJD ticket nung ai saka madok, tanaben 2013 election nunga NPF nung ai saka madok. Tangji pa NDPP ticket nungi tasembenbuba tokteper.
24 Angetyongpang constituency nung ya candidate 5 lir. Tang temendak MLA-ji S. Chuba Lkr. Pa ya 2013 nungto Independent nungi adok aser tesülen pa NPF nung aden aser takümji pa NPF nungi tokteper. Pa den toktepertemji; taoba NPF candidate aser tang JD (U) nungi aisang Sashimar Jamir, politics nung tejak tasen taoba Nagaland Chief Secretary aser NDPP candidate Alemtemshi Jamir (IAS Rtd), taoba NSF tir Tongpang Ozüküm Independent candidate ka ama tokteptsü aser NCP candidate Supongwati ya taoba mapanga toktepogo saka madok.
25 Mongoya constituency nung ya candidate asem lir. Tang temendak MLA-ji Merentoshi R Jamir lir saka takümji pa election nung metokteper. Takümji NDPP candidate Alemtemshi Jamir (IAS Rtd.), NPF candidate-ji taoba PHE minister Dr. Ngangshi K Ao aser taoba MLA S. Supongmeren Jamir NPP nungi tokteptsü.
26 Aonglenden constituency nung ya tang temendak MLA-ji Imtikumzük aser pa ya 2013 election nungto Congress nungi adok aser tesülen NPF nung dena parliamentary secretary mapang tatsüka inyak. Aji saka, tangji pa NDPP nungi tokteptsü. Pa den toktepsangji NPF candidate aser taoba MLA Toshipokba lir.
27 Mokokchung Town constituency nung candidate par pezü lir. Tang temendak MLA-ji C. Apok Jamir. Pa ya taoba election nungto Congress nungi adok saka tesülen pa-a NPF nung dena parliamentary secretary inyak. Tangji pa NPF nungi tokteptsü. Pa den toktepertemji; NDPP candidate taoba RD Director Metsübo Jamir, Independent candidate taoba Nagaland Addl. Development Commissioner Dr, Temsuwati aser INC candidate Rongsenshilu, parnokji politics nung tejak tasen dang lir. Mokokchung district nung aliba A/C rongnung voters ishiba alibaji Mokokchung town ya asütsü, iba A/C kübok town ward pungu lir.
28 Koridang constituency nung tang temendak MLA-ji Imkong L Imchen aser pa ya NPF nungi air. Pa den tokteperji ana lir; politics nung tejak tasen NDPP candidate C. Lima Imchen Rtd. IPS aser kaji NPP candidate T. Chalukumba lir. Chalukumba bo taoba election nunga Independent candidate ka ama toktep saka tamakok angu.
29 Jangpetkong A/C nung ya candidate asem lir. Tang temendak MLA-ji Dr. Longriniken aser pa BJP nungi air saka taoba election nungbo pa ya NPF nungi adok. Pa den tokteperji NPF candidate E.T Sunep aser NPP candidate Dr. Aochuba lir. E.T Sunep aser Dr. Aochuba na ya 2013 election nungto Independent nungi toktep saka tenaprongla tamakok angu.
30 Alongtaki nung candidate ana dang lir. NPF candidate aser tang temendak MLA Dr. Benjongliba Aier aser pa den toktepsangji politics nung tejak tasen BJP candidate Temjen Imna Along lir.