Dimapur yimti nung voters aikati solution dang nungibo terenlok taginüba

Dimapur, Tsüklai 28 (Agencies): Nagaland nung shishilembaba tiyongtsü, Dimapur nung Sangtennü (Mongolbar) Assembly election nung nüburtemi terenlok aginüa EVM button nung nemokja vote agutsüogo.
Yashi Dimapur nung TOI (Times of India) osangbenertemi voters aika ajurua asüngdangyaba mapang nung Dimapur nung voters aikati, Naga yimtenren onük latettsüji kanga tongtibang, ajisüaka tang atemabo gari lenmang, infrastructure terenlok aser mapa maongka tenüngdakba, ta langzüa liasü.
Arishi küm 34 tetsür ka tenüng agi, Somi R Naorem-i, “Gari lenmang jenjang ya reprangdangang. Atangji Dimapur nung nüburtemi Naga yimtenren onük latetdaktsüner, ajisüaka tongtibangtibaji terenlok aginer,” ta ashi.
Naorem-isa lai vote agutsüsang Dimapur-I nungi candidate jagi polling booth sema arutsü aser lai pa atar, ta ashi.
“Ni pa dang nai takok ngura nai nangzükbatem mamadoki inyakang ta ashitsü. Onok nem terenlok mapa inyakjang ta ashitsü,” ta laisa shisem.
Dimapur-II nungi arishi küm 30 lanur ka tenüng agi, Akum-i school kima polling station ka nung yamai ashi, “Ni asoshibo terenlok aser mapa aginer, iba sülen ang yimtenren onük asütsü,” ta ashi.
Iba dak alia yimti nung voters aikati onük aika rongnungi terenlok tongtibangba, ta langzüa liasü.
Yashinep 7:00 ako nungi polling tenzüktsü liaka 6:00 ako nungi tenzüka polling station aika nung nisungtem tarensena nokdaker liasü. EVM nung timtem aliba ajanga kar nungbo ghonda ana shi menor ang tenzük, ajisüaka parnok anibelem süngzüktsüsa party nung inyakertemi taseptsü nung amtsük lema agutsü.
Nüburtem melung masü tulutibaji gari lenmang mejungi aliba atema liasü.
Westyard Colony nung aliba polling station ka nung, Guwahati nung amenoka aliba pharma company ka nung inyaker ka tenüng agi, Anand Palit-i, “Onoki infrastructure tajungba aser gari lenmang tajungba aginer. Ni vote agutsütsü atema lenmang talangka nungi aruogo, aser asüng meyipa aotsü,” ta metetdaktsü.
Ano Dimapur nung aliba polling station ka nung Aso Ao-i, “Party aser parnok tenangzükbatem dang nungibo candidate tajungtemji tongtibangba,” ta ashi.
Ano nisung ka tenüng agi, Laxman Swamy-i, “Ni vote agutsütsü atema aru, ajisüaka polling officials-i, nisung kari kü meyong vote agutsüogo ta kü dang ashi,” ta mepelai metetdaktsü.
Pa ya software engineer ka lir aser pai IT solutions & training centre ka lapoka lir.
Pa den kinüngtsü aser arishi küm 3 jala ka anir polling station-i aru. Pa vote magutsütetaka pa kinüngtsübo vote agutsüteta liasü.