Nagaland nung vote agütsür 79.14% liasü; Metsüremi 2, 2018 nü re-poll asütsü; Centre 17 nung votes azüngtsü

Kohima, Tsüklai 28 (TYO): Nagaland nung Tsüklai 27 nü election agiba nung voting percentage ji 79.14% tashi tuogo, ta Chief Electoral Officer Nagaland, Abhijit Sinha-i ashi.
Polling anogo nung RO temi ghonda ana shia polling agiba osang metetdaktsüba nung ajemdaker voting percentage ji bushitet, ta pai ashi.
Polling party tem pei pei centre tonga aruba sülen ang shitakba osangji metettsü anungji polling percentage ji melenshitsü akok, ta Abhijit-isa shisem.
Tang tashi nung nisung teimbai vote agütsüba constituency ji Mokokchung kübok 23-Impur A/C nung 95% liasü aser tajemtiba agütsübaji Mon kübok Tapi A/C nung 53% liasü.
Maneni, noklang nung shilem 90 tema vote asüba constituency temji 50-Longleng A/C (92.12%,) 55-Tobu A/C (92%), 47-Tamlu (90.73%), 29-Jangpetkong (90.65%), 13-Pughoboto (90.2%) aser 32-Atoizu (90%) liasü.
Polling station 16 nung vote magütsüdaktsüba aser bogus voting asüba indang ken o 16 tashi political party balalai Election Secretariat tsüngdang benok. Item ken o tem atema polling ketdangsertem den kulikaket aser tanga kulitem reprangshiba mapa ano metemteti lir, anungji Election Commission-i re-polling asütsüba indang telemtetba ano magi, ta Election Secretariat nung ketdangsertemi ashi.
Re-polling asütsüsa kümra Metsüremi 2, 2018 nü asütsü akok, ta parnokisa shisem.
Metsüremi 3, 2018 anepdang 8:00 ako nungi election district 12 kübok centre 17 nung votes azüngtsü. Iba mapang polling station 2156 indang votes azüngtsü.
Votes azüngtsü atema tables 349 renemtsü aser itemji Dimapur nung centre ka nung 34, Peren nung centre ana nung 14, Kohima nung centre pungu nung 34, Pughoboto nung centre ka nung 6, Phek nung centre ka nung 26, Mokokchung nung centre ka nung 47, Zunheboto nung centre ka nung 36, Wokha nung centre ka nung 40, Mon nung centre ka nung 45, Longleng nung centre ka nung 14, Tuensang nung centre ka nung 35 aser Kiphire nung centre ka nung 14.