Taruba hopta France Tir, Macron-i India semdangtsü

New Delhi, Metsüremi 03 (Agencies): Ato kilonser, Narendra Modi-i jaokba nung ajemdaker France Tir, Emmanuel Macron-i Metsüremi (March) 9 nungi tenzüka anogo pezünü India semdangtsü, ta tanü Ministry of External Affairs (MEA)-i metetdaktsü.
Pa den pa kinüngtsü, Brigitte Marie-Claude Macron, shishilembartem aser ministry ketdangsertem densema arutsü.
MEA-i sangdong ka ajanga, “Linük ana tsüngda rongsenkettsüng, yimtenren aser asalentong tesendaktep yanglushitsü nükjidong nung Tir Macron-i linük semdangtsü,” ta metetdaktsü.
Kasa sangdong ajanga, “India aser France na strategic partnership ya 1998 küm tenzük, aser linük tsüngda tesendaktep rongnung iba ka kanga tongtibang lir,” ta metetdaktsü.
Linük anapronglai defence, maritime, space, security aser energy dak sendakba sectors nung amalitepa inyaktsü atema jembitsü, iba denji külemi kiralongra, climate change, sustainable growth & development, infrastructure, smart urbanization, science & technology cooperation aser youth exchanges jenjang tajungba akumtsü atema inyaktsü.
Ato kilonser, Modi aser France Tir na mendenbuba ser Metsüremi 11, 2018 nü International Solar Alliance (ISA) conference amentsü.
France Tiri tatemsabuba India semdangbaji 2016 küm Aenjeti ita nung liasü, iba mapang nungji Republic Day benjungmong sentong nung pa tongti tesemdanger liasü.
Yaküm June ita nung Modi-ia France semdangogo.
France leniri India semdangba mapang nungsa manufacturing & technology partnerships aser people to people contacts atema jembitsü.
Tang India nung France nunger company 1000 jungnüa lir. India nunger company 120 shii France nung Euro sen billion 1 dak tema indoka shishilembar iba den külemi nisung 7000 jungnüa mapa nung anioka lir.
France leniri linük semdangba mapang nungsa India-France CEO’s Forum senden amentsü.
Tang France nung Non-Residential Indians (NRIs) densema India nunger lakh 1.1 shi lidar.