Tsürabur kasetsang küm 19 kaketshir pua lir

Chicago, Metsüremi 03 (Agencies) : US lima Michigan state kübok university ka nung azünger kaketshir ka shibai pa azüngba school campus nung par tsürabur kaset, paji ghonda ishika bushia jajar külen kecha timtem makai dang pua aruogo, ta tanep yakta official-temi osang ka metetdaktsüogo.
Iba tatalokba sülen sepaitemi temulung prangpong bener alisangji bushia jajaba mapang yashinep Central Michigan University campus shibanga ayutsüsa aküm aser nikongdang tashi kaketshirtem classroom aser dormitory toktsür moteti atsükoka liasü.
Yasüng ayatrem süili campus anüdoklentip tsütsü adena jajaba train ka nung lia university kaketshir tenüng agi James Eric Davis-ji nisung kati angu, Ajiser timtem kecha mataloki dang paji officer-temi apu.
Iba nisungba jagi dormitory telung nung tebu, (police officer) aser tetsü kaset ta aija lir aser iba maparenji kibong sasep nung mangatettep adoka inyakba südi, ta university police otongdar kati metetdaktsü.
Iba dakji alaka tanga asü-ama ajurubabo kecha maliasü. Yashinep 8:30 ako meta iba lendong atalokba sülen central Michigan kübok Mount Pleasant yimti nung aliba college campusji ghonda ishika shibanga aser iba mapang ozüng amshirtemi helicopter aser police azü amshia Davis-ji bushi.
Nikongdang 3:00 ako meta police-i meiner kaketshirtemji college ki nungi aniteta kidangi yok, ta University official-temi metetdaktsü.
“Bellwood Police Officer, James Davis Sr aser pa kinüngtsü wife na kinüngertem den mangyim jashi lemsateper,” ta state representative, Emanuel Welch-i twitter ajanga metetdaktsü.