FIFA World Cup nung Video Assistant Referee (VAR) system amshitsü

Metsüremi 3, 2018 (Agencies): Asaya nung referee temi telemtetba agiba nung teyari agütsütsüba atema soccer’s rule-making body IFAB puri taküm World Cup nung video replay amshitsüba asoshi temelaba agütsüogo.
Football asaya achaayangba telok, FIFA-i temelaba dang agütsüra Video Assistant Referee (VAR) system World Cup nung amshitsü, ta shiogo aser kasa mapang nung Europe nung football achaayangba teloki Champions League taruba season nungbo iba inyakyim ya mamshitsü, ta shiogo.
Critics temi ashiba agi, VAR amshiba tetoktepba tem nung, talisa stadium nung terprangertem mangmangdaktsür, shirnoki telemtetba ka review asü asü masüar mejangjar.
International Football Association Board (IFAB) sangdong ka nung iba jenjang ya football asaya timi ochishia asayatsüba asoshi agi, ta metetdaktsü.
IFAB puri ashiba agi, VAR ya goal idaktsüba, penalty agütsüba, direct red card agütsüba aser mistaken identity amala tongtibang tensa nung dang amshitsü.
Iba amala telemtetba ajak video monitor referee-i match referee den tesendaktep nung agitsü.
Telemtetba ka ajaki reprangteta aibelenra, iba amala telemtetba ya lepa reprangshia melenshitsü. Pitchside monitor access aliba referee-ia review sütettsü.
VAR system benoktsüba ya FIFA tir Gianni Infantino 2016 Tsüklai nung tir mendeni atuba sülen nungi pa indang tongtibangtiba project rongnung ka liasü.