Dimapur Press Club-i aitsür

Dimapur, Metsüremi (March) 3 (TYO): Metsüremi (March) 3, 2018 nü Dimapur deputy commissioner indang office complex nung votes azüngdang Press aser media nisungtem nokdangba aser mezüngmeshiba inyakyim khukhua aitsür ta Dimapur Press Club (DPC)-i metetdaktsü.
Election dak sendakba osangtsüsang belentsü atema osangbenertemi Election Commission of India (EC) nungi temelaba meshi aser EC-i agütsüba pass nung counting centre nung entry/re-entry temelaba liasü. Ajisüaka, tanü vote-counting centre nung ketdangsertemi media tem senzüba noktang, ta DPC mendenpurtemi sangdong ka nung ashi.
Iba khuret ya Dimapur district election officer nem sangoktsü aser iba sülen jiang osangbenertem telungi yok saka ibajia “dobashi” ka ketdangsüba kübok ang mela aser counting centre shia minute ishika dang semdangdaktsü, ta DPC-i ashi.
Maneni, electronic media nungi osangbenertema EC nungi temelaba liaka, vote counting centre-i meyok, ta DPC-isa shisem.
Talisa counting centre tem nung ketdangser kari media nisungtem dang kanga mesenzütsü tenokdangba agütsüba atema kanga jashir. Osangbenertemi pei pei osangkaket aser yimozülurtem den mobile phone ajanga tongtepratepa osang belener aser counting centre nung mobile phone mamshitsü tenokdangba liasü.
Anungji, district electoral officer indang office aser pa kübok inyakertemi press indang temeten azüokogo aser ibaji public nem osang sangoktsü noktangba lir, ta Dimapur Press Club-i mepelaba metetdaktsü.