BJP-IPFT teloktepi Tripura nung Left sorkar atsüngdokogo

New Delhi, Metsüremi (March) 3 (Agencies): Tripura state Assembly election nung Bharatiya Janata Party (BJP)-Indigenous People’s Front of Tripura (IPFT) teloktepi takok tulu angu aser iba ajanga tesüina küm 25 tashi of Communist Party of India (Marxist)-i sorkar ketdangsüa aruba anendaktsüogo.
Taküm election nung BJP-i menden 35 nung aser IPFT-i menden 8 nung takok angu. Iba ajanga parnoki sorkar akümtsü menden nüngdakba dang nungi teimba ngutetogo.
Taküm election nung CPI (M)-i menden 16 nung dang takok angu. 2013 election nungbo parnoki menden 60 nungi 50 nung takok nguteta liasü.
BJP nung takok angurtem reprangdang Tripura state BJP tir Biplab Deb-i chief minister inyaktsü ama imlar. Ajisüaka, iba telemtetbaji BJP parliamentary board-i dang agitsü.
Tripura nung BJP-i takok tulu anguba atema nisung aika aoksar kechiyong iba state nung parnok indang MLA ka danga maliasü. Külen, parnok den yariteper IPFT-i menden 9 nung toktepba liasü aser iba nungi menden 8 nung takok angu.
Taküm assembly election nung Congress-ibo menden ka nung danga takok mongutet.
“Tripura nung alirtemi temelenshi atema vote agütsüogo. Onok temelenshi indang yimyim ayimba parnoki pusema nungitogo” ta BJP lennir Ram Madhav-i ashi.
“Nübortemi Manik Sarkar’er sorkar agi lakteter liasü. Parnoki küm 20 dak tema sorkar ketdangsüa aru aser nübortemi CPI(M) yimsüsüba agiena liasü” ta Tripura nung BJP in-charge aser Assam minister Himanta Biswa Sarma-ia ashi.
BJP-i IPFT den tesentaktep yangluba ajanga teyari angu. Tripura nung lisopur votes ji shilem 35 shi ka lir aser parnok ajaki BJP nem vote agütsü, ta paisa shisem.
Northeast nung telok tilatem aser talisa Khristantemi BJP anema noktaker ta asübaji tiyazü kechiyong parnoki kanga dang mulungsoa BJP pusema nungitogo, ta Sarma-isa metetdaktsü.
Külen, CPI(M) general secretary Sitaram Yechury-ia “Tripura nung vote agütsürtemi BJP-IPFT sorkar ka akümtsü atema takok agütsüogo. Tripura nung alirtemi onok nem tesüiba küm 25 tashi sorkar ketdang asütsü maongka agütsüba atema kanga pelar” ta metetdaktsü.
CPI(M)-i maneni BJP aser parnoki telemsa adokdaktsütsü atema inyakba mapa anema noktaktsü. Tripura nung dang masü saka linük ajungalen onoki BJP anema noktaktsü. Tripura nung BJP-i sen aser nisung tashi amshia liasü, ta Yechury-isa ashi.