Northeast nung BJP ainer

– Among P. Aier

Tawa Tripura, Nagaland aser Meghalaya indang assembly election tem nung Bharatiya Janata Party (BJP)-i takok
angubaji jenjang tajung ka alangzükba ama lir, kechiyong Assam aser Arunachal Pradesh nung parnok temeja sorkartem kümteta aliba dak alaka Northeast kübok tanüngba state sorkartem tem nungbo parnok shilem balaka maliasü. Northeast nung aliba nisung aika atema BJP ya ainer ka ama dang züngshia liasü saka taküm election nung parnoki nisung aika süngmangdakja takok ngutetogo aser state asemprongla nung parnok dena sorkar akümtsü. Tripura nung 2013 Assembly election nung parnoki vote 1.54% dang nguteta liasü saka takümbo parnoki menden 35 nung takok ngua vote 43% tashi nguteta liasü. Nagaland nunga 2013 election nung BJP-i vote 1.75% dang nguteta liasü saka takümbo 14.4% tongtetogo. 2013 küm parnoki Nagaland nung menden ka nung dang takok angu saka takümbo 12 nung takok angu. Küm ana tejakdang Northeast kübok BJP tsüngsü balaka maliasü aser ibaji Assam nungi MLA 5, Arunachal Pradesh nung 11 aser tanga state tem nung ana-asem ka dang liasü. Ajisüaka, tanü parnoki Northeast kübok state tenet nungi trok nungbo sorkar ketdangsüba nung shilem agitsüsa mapang ka ajuruogo. Northeast kübok non-BJP/NDA sorkar malibaji Mizoram dang lir aser iba state nunga taküm küm tatemlen assembly election agitsü lir. Linük nung aikati memetetba tesem ka aser ano yimtenren tsütsü tashi balaka maliba tesem ka ta züngshiba Northeast tesem nung BJP-i tesüiba küm sihika tsüngda mapa kanga inyaka aruogo. Northeast nungi Lok Sabha-i züngsem 24 dang yoker saka BJP general secretary Ram Madhav-i tesüiba küm ishika tsüngda iba tesem nung mapang aser rongsen aika endok. Northeast kübok tesem aika nung Khristantem teimba ser lir aser iba ama tesem ka nung BJP-i mapa inyaka aotsübaji kanga tasak lir aser iba jagi Rashtriya Swayamsevak Sangh (RSS)-i Northeast nung küm aika ola madoki dang mapa inyaka aruogo. BJP-i Northeast ya tongtipang ta züngshibaji tangatetba nung ajemdaker lir, kechiyong BJP-i India linük ya ka küma longjemtsü asoshi mapa inyaker aser iba nung arrtsülen aliba tesemtemji kanga tongtipang. Iba jagi parnoki Northeast dak tenük yoker aser temulung agütsür. Northeast nung BJP-i takok tajung ngutetbaji parnoki Centre nung sorkar ketdangsüba atema tulubalen asütsü, kechiyong northeast ya tangar memenepba tesem ka lir aser terenlok kanga nüngdaker. Northeast nung infrastructure jenjang kanga mejungi lir- lenmang, apu, water supply aser power khurettem jenti lir. Northeast state temi pei sasep peritsüsa rongsen aser saru mebendenteter aser iba jagi Centre dak teimla ayur. Iba jagi NE nung sorkar yimsüsürtemi Centre sorkar den yariteptsüsa akümer aser ibaji asü nungdang teyari shitak ngua pei pei state tem nung sorkar ketdangsüa oteter. Iba tangatetba nungji ajemdaker Arunachal Pradesh Chief Minister Pema Khandu-ia par telok BJP den adentsü mulungtet aser 2014 küm Centre nung NDA sorkar akümba sülen Naga People’s Front aser Sikkim Democratic Front ama regional party temia NDA teloktep nung adentsü telemtetba agia liasü. Ibaji toktsür BJP-i northeast nung raloka otettsüsa tensa ka ajurubaji parnoki tanga political party nungi lennirtem aniokba asütsü. Iba inyakyim yagi Northeast nung BJP kanga ajangzükogo aser talisa party masü saka candidate tejak ang repranga vote agütsüba tesem ka nung iba ajanga parnoki teyari tulu angur. Northeast nung political party dang nungi yimtsüng, kin aser kidongtem ang tongtipangba aser tuluba ta züngshir aser iba jagi candidate temi party melen yonga vote bo angur. Tawa assembly election agiba state asem- Tripura, Nagaland aser Meghalaya nung takok anguba BJP MLA tem teimbaka taoba mapang tanga party tem nungi MLA inyakertem lir. Tripura nung chief minister inyaktsü aliba Biplab Deb ya dang RSS nungi lir aser ano northeast nung tang chief minister teinyakdak purtem ya shinga BJP-RSS züngsemtem süa aruba masü. Pema Khandu aser N Biren Singh na ya taoba mapang Congress züngsemtem liasü aser Sarbananda Sonowal ya Asom Gana Parishad züngsem ka liasü. BJP-i tesüiba küm ishika tsüngda Northeast nung kanga dang meranga inyakba ajanga takok tulu ngutetogo aser state ajak nung parnok jenjang tajung alangzüktetogo, saka parnoki tangatetba melenshir inyaksangshia aotsüla. BJP-i linük jenjang nung masü saka teküpokba jenjangi alur Northeast nung telok tilatem aser kintem nem-a yimten ketdangsübaren nung maongka agütsütsüla. Linük nung nashishi noktangtsü onük ajanga BJP sasep nung telemsa adoktsü, kechiyong Hindu nunger teimba ser aliba tesemtem nungibo nashi tepsetba noktangtsü akhangtsü saka ano parnoki Northeast nung lisopurtem achiajembajia akhümtsübutsüsa akümtsü. BJP-i yimjak nung Hindutva pusema nungiter saka tangbo parnoki tamangba yimsü onük nunga tiyongtsü nung alitsüsa akümtsü. Mizoram dak alaka Northeast ajungalen BJP nungpoka aitetogo saka parnoki mekümdangra ibaji mapang tatsüka atema dang asütsüa akok. BJP-RSS-i mandir, nashi tepsetba noktangtsü aser Uniform Civil Code tangatetba nung ajemdaker mapa inyaktsü merangra, Northeast nung parnok mapang talang kabo chuba mesütettsü.