CBI ket nung Karti anogo asem tali ayutsü

New Delhi, Metsüremi 06 (Agencies): Sübokrem agiba ken o nung aitsüba sülen taoba hopta apusang, Karti Chidambaram ya CBI ket nung anogo asem tali ayutsü asoshi tanü (Sangtennü) atsülangtsü.
Pai bail nung chioktsü temebeshiba agütsüba ya Metsüremi (March) 9 nung angadangtsü, ta osang ajanga ashi.
CBI ajanga Delhi court dang Karti ya anogo toku tali ayutsü atsülangtsütsü asoshi mepeshia liasü.
Special CBI court ajanga obendang magütsüdang, Karti-i tashiba mangar, ta counsel additional solicitor general (ASG), Tushar Mehta ajanga mulungtepa aitsüogo.
“Mobile meshizükba sülen aija alisangi, ‘Ni passwords magütsütsü, na mulumi-i oang,’ ta shira iba dangjia tashi mangaba ta ajar,” ta Mehta-i ashi.
“Indrani Mukerjae indang kuli ya onok atema ka lir, saka iba kisüng ya masü,” ta pai shisem.
Karti tebu P Chidambaram ya finance minister inyakba mapang Foreign Investment Promotion Board in-charge liasü, aser iba mapang Karti mesüzüktsü mechi sen crore asem dak tali sübokrem agütsü, ta INX Media promoter Indrani aser la kinungbo Peter nati aitsü. Bendanglen nungi teyari bener arutsü asoshi company tem nem iba board ajanga temelaba agütsür.
Külen Karti indang lawyer, Abishek Manu Singhvi-i ashiba agi, iba agency (CBI)-i kuli kicha magütsür saka tebang agi iba ken o bushisüngdang asütsü ta lepshia ashir.
“CBI-i kuli kata magütsü mesüra iba application nung kuli kata zülua mali. Karti Chidambaram aser Indrani Mukerjea tsüngta minute 25 dang o langzütep aser taoba anogo pongu tsüngta ghonda ana asüngdangya aser iba dak tali parnok ket nung ayutsü menüngdak,” ta Singhvi-i ashir.
Enforcement Directorate (ED) nem Karti ya mepudaktsütsü mechi tanükba meshi, saka Supreme Court-i memulungba sülen iba totuyuba ya agütsü. Saka ED-i FIR mebenoki iba ken o bushisüngdang asüba anema pai writ petition agütsüba angadangtsübo linük nung temaba court-i mulungogo.
Tawa Karti ya London-i aodang inyaksangshiba maparen ya tesüngmangtsüka lir, ta CBI-i nokdakba sülen pa ya CBI ket nung Metsüremi (March) 1 nungi yua lir. Pa ya Mukerjea nungertemi kuli agütsüba nung ajemdaker Tsüklai (February) 28 nung apu.
Amungnü Indrani aser Karti na ya Mumbai nung aliba Byculla jail nung tejak o tejak jitepa ajurutepdaktsü, kong lai maneni CrPC indang Section 164 kübok magistrate aser ken o bushisüngdangertem matsüngdang kuli agüja aliba kasa ashi.
“Indrani-i telangzüba ajak süngjema agütsü aser iba mapang lai taoba Finance Minister (P Chidambaram) aser iba sülen Karti den ajurutepba ashi aser iba mapang company yaritsü mechi Karti-i sübokrem meshi, koba parnoki agütsü. Lai court nunga iba nung nokdaktsü renema lir,” ta CBI osang ka ajanga ashi.
Oset tasen shishilembatsü mechi sübokrem sen agütsü, ta aija aliba firm, Advantage Strategic Consulting (P) Limited den Karti tesendaktep kecha mali, ta pa indang counsel temi ashir.
Karti apuba ya tawa linük nung aliba bank tem nung taila mapa inyakba nung temulung agüja aliba agientsü asoshi BJP-i nüburtem ashioktsüba sentong ka dang lir, ta Congress-i aitsür.
Saka BJP-ibo nisung kata ozüng dang temaba mali, ta ashir.
“Ni amanger, shingaia pai sasa linük nung aliba ozüng dang temaba ama mebilemtsüla. Aibelenertem ozüng kübok tepuokdaki yoker aser iba ajanga par mapa inyaker,” ta BJP lenir, Sambit Patra-i ashi.
“Iba nung political party temi mangatettep adoka tanga party tepsettsü merangba ni mangur. Ibai ozüng lir,” ta pai shisem.