Indian Women’s Football League Metsüremi 25 nü tenzüktsü

New Delhi, Metsüremi 6 (Agencies): 2buba Indian Women’s League football asayamung mezüngbuba asaya nung Defending champions Eastern Sporting Union aser Indira Gandhi Academy for Sports & Education na asayatsü. Iba asayamung ya Metsüremi (March) 25 nungi tenzüka Shillong nung asayatsü.
Asayamung nung team teneti shilem agitsü aser parnok ajak khen khen asayaba sülen temaba jenjang nung tembangba telok pezü Rongchii (April) 12nü nungi tenzüka semi-finals asayatsü. Final asaya Rongchii 15 nü asayatsü asoshi renema lir.
I-League 2017-18 nung mezüngbuba shilem agiba telok Gokulam Kerala FC pur tetsür team-a iba asayamung mezüngbuba anogo nung Odisha nungi Rising Student Club den asayatsü. I-League nung club tem rongnungi parnok club-i dang iba asayamung nung shilem agitsü asoshi tetsür team yoka lir.
Tetsürtem football asaya nung ajungkettsüba ya All India Football Federation asoshi tongtibangtiba onük rongnung ka lir aser IWL mezüngbuba asayamung 2017 küm tetenzüklen Delhi nung ayongzüka asayaogo. Iba asayamung ya fan temi kanga sapua reprangogo.
AIFF general secretary Kushal Das-i ashiba agi, tetsürtem football asaya tsütsü ajungkettsüba ya tongtibangtiba onük ka lir.
“AIFF-i India nung tetsürtem football nung tarutsü angateta lir. IWL tanabuba asayamung ajanga tetsür football asayar aikanem India nung parnok temaba jenjang nung asayatsü asoshi maongka agütsütsü,” ta pai ashi.
“Mezüngbuba asayamung kanga takok ngua kaogo aser iba atema ni stakeholders tem ajak tenüng asanger aser maneni iba ya meraksai bener aotsü nükjidong lir,” ta paisa shisem.
Iba asayamung nung shilem agitsüba teloktemji; Eastern Sporting Union, Rising Student Club, KRYHPSA, India Rush Scocer Club, Sethu FC, Gokulam Kerala FC aser Indira Gandhi Academy for Sports & Education alitsü.