IPTF pur nem minister menden ana atatsü

Agartala, March 8 (Agencies): BJP den senteper tawa Tripura election akokba telok IPFT- Indigenous People’s Front of Tripura puri ashiba agi, parnok cabinate menden ana atatsü.
Parnok nem menden kwi agütsütsü ta asüba ken o ya Assam minister aser North East Democratic Alliance (NEDA) mendenbuba Himanta Biswa Sarma den senden ka akaba sülen tembanga telemtetba agiogo.
IPFT Secretary, Mevar Kumar Jamatiya-i osangbenertem dang ashiba agi, “Onoki cabinet menden pezü meshia liasü saka ana agitsü asoshi mulungogo. BJP puri onok takhangba asadanga kokra menden timba agütsütsü telemtetba agiogo aser iba telemtetba yagi onok temulung süa dang lir.”
Parnok nem agütsüba portfolio indang asüngdang dang, Metsüremi 9 nü cabinet tem tenangzükba magi tashibo iba osang ya melemsateptettsü, ta pai langzü.
IPFT puri taoba mapang cabinet nung parnok nem menden tajung lemzüktsütsüba aser lisopur MLA rongnungi chief minister shimtsü asoshi khanga liasü.
Iba sak sendakba nung Jamatiya-i ashiba agi, “iba ya ken o tejen lir aser onoki iba ya tangbo mejembiner. Onoki pelaa dang lir.”
Tripura Assembly nung menden 60 dang lir anungji chif minister densema minister 12 dang shimtettsü.
Sarma-i ashiba agi, Tripura sorkar tasenba nung BJP aser IPTF na tesendaktep nung aotsüba atema inyakyim ka pai tembanga renemtsüogo.
BJP-IPFT na senteper Tripur assembly menden 60 nungi 43 kokteta liasü aser iba nung BJP puri menden 35 aser IPTF puri ti ta koktet.
BJP state tir Biplab Kumar Deb chief minister ama asüng tenangzükba agitsü. Lisopur lenir tejen aser Tripura royal family züngsem Jishnu Devvarma deputy CM asütsü. Pa-a BJP nungi lir.