Lenin indang kerak yanglu raksatsüba atema nisung 4 aitsüogo

Agartala, Metsüremi 8 (Agencies): South Tripura district kübok Belonia tesem nung Tentonü Lenin indang kerak yanglu raksatsüba ken o dak sendakba nung Tripura police-i Rasemnü ken o ashishitsü asoshi nisung pezü jaokogo.
Superintendent of police (South) Manchak Ipper-i ashiba agi, tang tashi nung yimten yimsüsüba den iba ken o sendaka aliba kecha nguteta mali.
Iba tatalokba dak sendakba video ka nung BJP pusemertem asütsü ta temulungi melemi bilemba nisung kari ‘Bharat Mata ki jai’ ta asatepa Lenin indang süklep 14 talang kerak yanglua ya JCP ka agi raksatsüba nguogo, koba mapang tatsüka tsüngda nung ayimsünga prokshi.
Iba sülen mapang tatsüka lir iba tatalokba ya South Tripura kübok Belonia, College Square nung atalok ta jangjaa aküm.
Police-i Article 41 CrPC (arrest without warrant) dak ajemdaker ken o ashishitsü asoshi nisung pezü jaokogo. “Ken o ashishiba sülen onoki taruba jenjang agitsü atema telemtetba agitsü,” ta Ipper-i ashi.
Parnok pezü rongnung Raju Nath dangbo ken o ashishiadokogo aser tanungba asem rongnung bulldozer kibur Suman Majumder, Manik Das aser Uttam Saha densema lir aser parnok anogo ana tsüngda nung police den ajuruteptsü imlar. Parnoki iba tetuyuba sülen manidakra aputsü.
Bulldozer anisang Ashish Paul-bo Tentonüsa puogo aser pai osang agütsüba dak ajemdaker parnok pezü nem iba tetuyuba ya agütsü, ta police temi metetdaktsü.
CPM state secretary Bijan Dhar-i iba tatalokba dak sendakba nung BJP aser IPFT aitsüogo.
“Onoki iba tatalokba ya kanga mejungi aitsür. Belonia nung Lenin indang kerak yanglu raksatsüba nung BJP aser IPFT densema alitsü, ta onoki bilemer, kechiyong kerak yanglu laoba mapang nung parnok pelatepba ajaki nguogo,” ta video clip ateshia pai ashi.
Paisa ashiba agi, Tripura Angh shiba BJP lenir liasü paia iba maparen ya pusemogo. Angh-i tweet ka ajanga Sangtennü ashiba agi, democratic yimya nung shimba sorkar kati tanga sorkakati inyaka aliba maparentem agintsü akok.
BJP otongdar Mrinal Kanti Deb-i ashiba agi, Lenin indang kerak yanglu raksatsüba nung BJP pur shinga densema meliasü. “Iba mapa ya CPM züngsemtemi inyakba lir. Iba mapa nung densema alir ajak merenshitsüla,” ta pai ashi.
BJP state tir aser chief minister designate, Biplab Kumar Deb-i Sangtennü election tembangba sülen lendong bener arutsü shinga medoktsütsü.
Police temisa ashiba agi, taoba ghonda 24 tsüngda nung BJP aser CPM pusemertem tsüngda mangatettep adokba ken o 11 tashi benokogo. Ajisüaka superintendent of police (control) Pradip De-i ashiba agi tensa tangbo kanga junga azüoker lir. Küptoknü election result sangdongba sülen nungi tang tashi nung ken o 14 tashi benokogo.
Sangtennü north Tripura district, Dharmanagar subdivision kübok Alambazaar tesem nung mangatettep adoka CPM pusemer ana aser BJP pusemer pezü, ta yiruogo. Iba dak sendakba nung Sangtennü aonung nisung pezü puogo.
Kasa mapang nung Guwahati nung Left-Democratic Manch puri Belonia nung Lenin indang kerak yanglu raksatsüba anema longkak aitba sentong ka ayongzüka kaogo. Iba telok nung CPM, CPI, CPI(M-L), Janata Dal (Secular), Samajwadi Party, Nationalist Congress Party, Aam Aadmi Party, Asom Sangrami Mancha, Liberal Democratic Party, Forward Bloc aser Revolutionary Communist Party of India densema lir.