China aser India na kati ka dak melung alemtsüla: Wang Yi

Beijing/New Delhi, Metsüremi 08 (Agencies): Tanü China Foreign Minister, Wang Yi-i, China aser India nati kati ka dak melung lemteptsüla, aser linük ana tesendaktep nung ibaji kanga tongtibang, ta ashi.
Chinese Parliament senden aliba mapang nung osangbenertem den jembidang Wang-i, yaküm linük ana arrtsülen ita ana tashi rara adoktsüsa tensa ka liasü; melung melemtepba ajanga melung lemtep agi melentsüla, ta ashi.
Taküm linük ana tesendaktep tajungba akumtsü teimla nung Minister-i, “China nunger dragon aser India nunger shiti na tsüngda meraratsüla saka külemi tsüngsangtsüla,” ta ashi.
Yaküm Sikkim kübok Doklam nung linük ana tsüngda raratsüsa tensa ajuruba sülen linük ana tesendaktep tera mekonga kümogo.
Ano UN nung Pakistan nunger kiralongrar, Masood Azhar nokdangtsü atema benokba nung China-i memelungba aser Nuclear Suppliers Group nung India züngsem akumtsü atema benokba nung China-i nokdangba ajanga-a linük ana tesendaktep mejungi akum.
China lenirisa, “Tentendangba kar aser timtem kar liaka China-India tesendaktep indar. Iba maparen nung China-i pei temeten aser onüktem kümzüka ayuba den külemi tesendaktep wazüka ayutsü atema inyaker,” ta ashi.
“Tesendaktep ajungtsü atema China aser India lenirtemi asalentong mangdang yua lir. China nunger dragon aser India nunger shiti tsüngda meraratsüla saka külemi tsüngsangtsüla,” ta Wang-i ashi.
Pai ashiba agi, India aser China tsüngda tesendaktep atema kanga tongtibangtibaji temelung lemtep asutsü.
“Yimtenren nung temelungtep lira Himalayas-ia dena iba tesendaktepji meraksatsütettsü. Ibaji medenibo litsü agia asenok melongjemtettsü,” ta pai ashi.
Taoba ita India Foreign Secretary, Vijay Gokhale-i China yimtiba, Beijing semdanga Wang aser China ketdangser, Yang Jiechi na ajurua liasü.
Taküm June ita China nung Shanghai Cooperation Summit aliba mapang nung Ato kilonser, Narendra Modi-i China Tir, Xi Jinping ajurutsü imlar.