Longleng nung DPDB senden menogo

Dimapur, Metsüremi 08 (TYO): Longleng Deputy Commissioner, John Tsulise Sangtam mendenpuba sür DC indang Conference Hall, Longleng nung Metsüremi (March) 7, 2018 nü Longleng District Planning & Development Board (DPDB) senden menogo.
Iba senden nung adenertem Deputy Commissioner-i pela agizükba den kümeli district nung election agiba mapang district administration aser Election Commission of India den yaritepba asoshi sorkar mapa inyaker ajak dang pelaba lemsatep.
District nung election yimjung nung agitetba ajanga Longleng district nung sorkar mapa inyakertem, civil society, NGO aser arogo balala amalitep aliba sayur aser sorkar ketdangsertem teyari maden asübo election mapang lendong jenti ajurur alitsü asü, ta pai shisem.
Election agitsü osang sangdongba mapang nungi vote azüngba anogo tashi yimjung aser tangatettep nung anogotem süyidaktsüba asoshi nüburtem dang kanga pelar, ta pai shisem. Tesem aika nung PWD ajanga lenmang junga anepaluba ajanga election mapang ketdangsertem timtem majurui süyidaktsüogo, ta pai PWD dang pelaba shisem.
Ketdangsertem aibelener ajak ozüng nung aliba ama tapet temerenshi agütsütsü, ta DC & DEO-isa metetdaktsü.
Taruba DPDB senden nung medical department inyakyim indang osang agütsütsü asoshi pai metetdaktsü.