Minerva Punjab team-i I-League title koktetogo

New Delhi, Metsüremi 8 (Agencies): Yangtepnü Tau Devi Lal Stadium, Gurgaon nung Minerva Punjab puri goal 1-0 agi Churchill Brothers madak takok ngua I-League title koktetogo.
Iba asayamung temaba jenjang nung tembangtsüba atema Minerva puri iba asaya akoktsü nüngdak liasü aser asaya mezüngbuba shilem nung William-i goal ka indaktsübaji parnok asoshi iba asayamung akoktsü teperi liasü. Minerva club ya Punjab nung amendaker lir aser parnok top division nung tang agi küm asembuba dang asayar liasü.
Iba season nung tatembangbuba asaya masaya tsüngda I-League title atema tokteper team pezü liasü, saka item ajak ajateta Minerva puri kokogo aser parnok ya linük nung Northern tsütsülen nungi iba asayamung akokba mezüngbuba telok kümogo.
Tetembang buba asaya tashi nung Minerva puri asaya 17 nungi point 32 nguteter liasü aser parnok sülen Neroca FC, Mohun Bagan aser East Bengal liasü. Iba asaya makokba ajanga Churchill Brothers pur second division-i atsüngzüka luogo.
All India Football Federation tir Praful Patel-i Minerva Punjab Football Club tenüng asang.”I-League akokba atema aser taruba season nung ACL Qualifiers nung jenjang ka ngutetba asoshi Minerva Punjab Football Club nem tenüngsang agütsür.Iba league ya kanga dang toktepa asayaogo aser jangratemtsüka liasü. Asaya tatembangbuba tashi nung telok pezüi asayamung koktettsüsa maongka ngua asayatetba ya tajinütsüka liasü,” ta pai ashi.
Minerva Punjab puri asaya mezüngbuba shilem kanga junga tenzük aser asayar Chencho, William aser Girik nungeri Churchill pur defence nem kanga timtem agüja liasü. Asaya tenzüker minute 8buba nung Chencho-i goal agütsütsü asoshi maongka nguteta liasü saka tia maka magütsütet.
Iba sülen minute ishika lir Akash Sangwan-i goal agütsütsü asoshi maongka tajung ka ngutet saka pai ball goal keeper dak indang indanga metsülokja goal magütsütet. Ajisüaka minute 16 buba nung Girik-i gola nung ball metsüoktsüba meyiper adokba William-i idaktsü, koba parnok atema asayamung akoktsü asoshi teperi liasü.
Asaya tanabuba shilem nung telok anapronglai goal agütsütsü asoshi maongka tajung aika nguteta liasü saka goal ka danga magütsüteti goal 1-0 nung dang asaya tembang aser iba ajanga Minerva pur nem takok agütsü.